हेटौंडाः बागमती प्रदेशको भौतिक पूर्वाधार विकास मन्त्री केशवराज पाण्डेले प्रदेशभित्र सञ्चालन हुने स्थानीय र छोटो रुटको भाडादर छिट्टै समायोजन हुने बताउनुभएको छ । भाडादर समायोजन गर्न प्रदेशसँग आवश्यक नियमावली नहुँदा त्यो बनाएर राजपत्रमा प्रकाशित भइसकेको र भाडा समायोजन गर्न बनेको अध्ययन समितिले प्रतिवेदन तयार गरेको भन्दै भाडा समायोजन अन्तिम चरणमा पुगेको मन्त्री पाण्डेले बताउनुभयो । भाडा समायोजन गर्न अध्ययन समितिले तयार पारेको प्रतिवेदनको विश्लेषण गरेर निर्णयमात्र हुन बाँकी रहेका उहाँले बताउनुभयो ।
प्रतिवेदनको विश्लेषण गरेर भाडा समायोजन हुने अन्तिम चरणमा पुगिसकेको अवस्थामा केही यातायात व्यवसायीले एकतर्फी भाडा निर्धारण गर्ने, आन्दोलन गर्नेजस्ता कार्यहरु गरेकोप्रति आफ्नो ध्यानाकर्षण भएको मन्त्री पाण्डेको भनाई छ । सोमबार काठमाडौंका अधिकांश सार्वजनिक यातायातले सेवा बन्द गरेका थिए । यसअघि केन्द्र सरकारले राष्ट्रियस्तरमा अन्तर प्रदेशमा चल्ने सवारीको २८ प्रतिशतले भाडा वृद्धि गरेको थियो । स्थानीय तहको र छोटो रुटको भने प्रदेश सरकारले भाडा निर्धारण गर्ने कानुनी व्यवस्था रहेको छ ।
केन्द्र सरकारसँग ऐन, नियमावली भएका कारण छिट्टै भाडा समायोजन भएको तर बागमती प्रदेशसँग ऐन, नियमावली नहुँदा भाडा समायोजन हुन केही ढिलाई भएको हो । यातायात व्यवसायी, संघसंस्थाको सहकार्यमा छलफल भई समायोजनको प्रक्रिया अघि बढिसकेको भन्दै मन्त्री पाण्डेले केही दिनभित्रै यसको निर्णय हुने बताउनुभयो ।
यता बागमती प्रदेशको भौतिक पूर्वाधार विकास मन्त्रालयका प्रवक्ता नवीन सिंहले पनि सोमबार एक प्रेस विज्ञप्ति जारी गर्दै छोटो समयको अवधिमा प्रदेश भाडा निर्धारण-समायोजन तथा विद्युतीय माध्यमबाट भाडा भुक्तानी नियमावली, २०७८ बनाएर राजपत्रमा प्रकाशित भएको जनाएका छन् । भाडा निर्धिारण समायोजनसँगै ठूलो संख्यामा रहेका यात्रुलाई प्रत्यक्ष प्रभाव पर्ने भन्दै मन्त्रलायले गम्भीररुपमा यो विषयलाई लिएको र प्रक्रिया छिटो पूरा गरेर भाडादर समायोजन गर्ने प्रवक्ता सिंहले जानकारी दिनुभयो । उहाँले विभिन्न यातायात व्यवसायीहरुले भाडा समायोजन हुने प्रक्रियामा रहँदारहँदै आन्दोलन गर्ने, भाडा निर्धारण गरेको पाइएको भन्दै कानुनविपरित कार्य नगर्न÷नगराउन व्यवसायीलाई अनुरोधसमेत गर्नुभएको छ ।
