हेटौंडाः मकवानपुरको भीमफेदी कारागारबाट ४३ जनाको बाँकी कैद मिनाह गर्न सिफारिस भएकोे छ । असोज ३ गते संविधान दिवसको अवसरमा राष्ट्रपतिले विभिन्न कैदीबन्दीहरुको बाँकी कैद मिनाह गर्दै आउनुभएको छ ।
मकवानपुरको भीमफेदी कारागारबाट पनि मापदण्ड पुगेका ४३ जनालाई कैद मिनाहको लागि सिफारिस गरिएको कारागार प्रमुख नारायण पाण्डेले बताउनुभयो । ५० प्रतिशत कैद भुक्तानी गरेका, असल चालचलन भएको, थोरै कैद समय बाँकी भएकाहरुलाई बाँकी कैद मिनाहको लागि सिफारिश गरिदै आएको छ । गणतन्त्र दिवस, संविधान दिवस र प्रजातन्त्र दिवसको अवसरमा सिफारिश भएका कैदीहरुको बाँकी कैद मिनाह गरिदै आएको छ ।
मकवानपुरको भीमफेदी कारागरमा अहिले १ हजार कैदीहरु रहेका छन् । कारागारमा महिला बन्दी गृह निर्माण भएपनि पुरुषहरुलाई मात्र राखिदै आएको छ । कारागारमा महिला कैदीलाई राख्न सुरुवात नभएको कारागार प्रमुख पाण्डेले जानकारी दिनुभयो ।
