चन्द्रपुरः रौतहट जिल्लाको चन्द्रपुर नगरपालिका–४, कप्तानटोलस्थित जनजागृति पुस्तकालय पुनः सञ्चालनमा आएको छ । करिब एक दशकदेखि बन्द अवस्थामा रहेको पुस्तकालय मोती जयन्तीको अवसर पारेर मंगलबारबाट पुनः सञ्चालनमा आएको हो । चन्द्रपुर नगरपालिका र स्थानीयको सहयोगमा २ तल्ला पक्की भवन निर्माणपछि मंगलबार चन्द्रपुर नगरपालिकाका मेयर रामचन्द्र चौधरीले पुस्तकालयको उद्घाटन गर्नुभएको हो ।
पुस्तकालय उद्घाटन गर्नुहुँदै मेयर चौधरीले पुस्तकालयका लागि पुस्तक खरिद गर्न पाँच लाख रुपैयाँ सहयोगको घोषणा समेत गर्नुभएको छ । नगरपालिकाले पुस्तकालय भवन बनाउन सहयोग गरेको बताउनुहुँदै मेयर चौधरीले पुस्तकालयमा सबैलाई उपयोगी पुस्तक हुनुपर्ने बताउनुभाये । पुस्तकालय स्थापना गर्न अग्रसर नागरिक समूहप्रति आभार व्यक्त गर्नुहुँदै मेयर चौधरीले पुस्तक खरिद गर्न ५ लाख रुपैयाँ सहयोग गर्ने घोषणा गर्नुभएको हो ।
पुस्तकालय उद्घाटनकै अवसरमा जनजागृति पुस्तकालयलाई मंगलबार पुस्तकालय अभियान समूह मकवानपुरले ५० हजार रुपैयाँ बराबरको पुस्तक सहयोग गरेको छ । पुस्तकालय अभियान समूहले एक सय ५० थान पुस्तक सहयोग गरेको हो । पुस्तकालय अभियानले सहयोग गरेर हालसम्म १३ वटा पुस्तकालय स्थापना भइसकेको छ । पुस्तकालय अभियान समूह मकवानपुरको प्रयासप्रति कार्यक्रमका वक्ता सबैले प्रशंसा गरेका थिए । पुस्तकालय अभियान समूह मकवानपुरका सदस्य सुरेश श्रेष्ठले पुस्तकालय अभियानका बारेमा जानकारी गराउनुहुँदै रौतहट जिल्लामा जनजागृति पुस्तकालयले नै पुस्तकालय अभियान सञ्चालन गर्नुपर्ने धारणा राख्नुभयो ।
कार्यक्रममा वडा अध्यक्ष अमर आलेले पुस्तकालय स्थापना गर्न भन्दा नियमित सन्चालन गर्न गाह्रो हुने बताउनुभयो । पुस्तकालय नियमित सन्चालन गर्न आत्मैदेखि समर्पण चाहिने बताउनुहुँदै वडा अध्यक्ष आलेले किताबले मानिसलाई अनुशासित, संयमित र असल बनाउने बताउनुभयो । उहाँले पुस्तकालयलाई व्यवस्थित बनाउन वडा र नगरबाट सक्दो सहयोग रहने प्रतिवद्धता व्यक्त गर्नुभयो ।
पूर्व वडा अध्यक्ष कृष्ण तिमल्सिनाले बालबालिकालाई कथा सुनाउँदै जनजागृति पुस्तकालय स्थापना गरिएको स्मरण गर्नुहुँदै जनजागृति पुस्तकालयलाई चन्द्रपुरकै प्रमुख पुस्तकालयको रुपमा विकसित गर्नुपर्ने बताउनुभयो । उहाँले बालबालिकाले पुस्तकालयको नियमित प्रयोग गर्नु पर्ने उल्लेख गर्नुहुँदै पुस्तकालय सञ्चालन र व्यवस्थापनमा जनप्रतिनिधि मात्रै नभएर नागरिक तहबाट सदैव सहयोग हुनुपर्ने बताउनुभयो । वडा सदस्य प्रेमकुमारी तिमल्सिनाले पुस्तकालय समाजको गहना भएको बताउनुभयो । पढ्न, बुझ्न पुरुषले जति अवसर पाएका छन् महिलाले पनि उत्तिकै अवसर पाउनुपर्ने वडा सदस्य तिमल्सिनाको धारणा थियो ।
डिभिजन वन कार्यालय रौतहटका प्रमुख अमरदेव यादवले मकवानपुरबाट पुस्तकको भण्डार प्राप्त भएको बताउनुहुँदै जीवनको ज्ञान पुस्तकबाट प्राप्त हुने धारणा राख्नुभयो । यादवले पुस्तकालयलाई ५ हजार रुपैयाँ सहयोग गर्ने पनि बताउनुभएको छ । नेपाली सेनाका प्रमुख सेनानी राजन दाहालले व्यक्तिगत तर्फबाट नेपाली सेना र युद्धका इतिहास विषयका २० हजार बराबरको सहयोग गर्ने बताउनुभयो ।
पुस्तकालयका अध्यक्ष भूमिलाल न्यौपानेले घर–घरबाट पुस्तक संकलन गर्दै २०५१ सालमा स्थापना गरिएको पुस्तकालयले साहित्यिक गतिविधि गर्ने गरेको स्मरण गर्नुभयो । सदैव सल्लाह, सुझावको अपेक्षा गर्नुहुँदै न्यौपानेले पुस्तकालय व्यवस्थित रुपमा सञ्चालन गर्ने प्रतिवद्धता समेत व्यक्त गर्नुभएको छ । पुस्तकालय उद्घाटनको अवसरमा जनजागृति पुस्तकालयले नगरस्तरीय हाजिरीजवाफ प्रतियोगिताको समेत आयोजना गरेको थियो ।
