हेटौंडाः नेपाली कांंग्रेस मकवानपुरले आइतबार वडा अधिवेशन गरेको छ । मकवानपुर जिल्लाका १०२ वडामध्ये अधिकांश वडामा नेतृत्व सर्वसम्मत चयन भएको छ । मकवानपुरको बकैया गाउँपालिकाका १२ वडा, बागमती गाउँपालिकाका ९ वडा, राक्सिराङ गाउँपालिकाका ९ वडा, कैलाश गाउँपालिकाका १० वडामा निर्वाचन सम्पन्न भइसकेको कांग्रेस मकवानपुर पार्टी प्रवक्ता प्रदीप कोइरालाले जानकारी दिनुभयो । त्यहाँका केही वडामा नेतृत्वको घोषणामात्र हुन बाँकी रहेको उहाँको भनाइ छ ।
यता बकैया गाउँपालिकाको ७ नम्बर वडामा मात्र सभापतिको मात्र मतदान भएको थियो । गाउ“पालिकाको १२ वडामध्ये अन्य सबै वडामा सहमतिमा नेतृत्व चयन गरिएको छ । १०२ वडाबाट एक हजार ७ सय २ क्षेत्रीय प्रतिनिधि चयन हुनेछन् । वडा अधिवेशनले सभापति एक, उपसभापति दुई, सचिव दुई र सहसचिव दुई गरी सात पदाधिकारी निर्वाचित गरेको छ । समावेशी कोटामा लगभग सबै वडामा सहमतिमै नेतृत्व चयन भएको पार्टी प्रवक्ता कोइरालाले बताउनुभयो । मुख्य खुलातर्फको पद र सभापतिमा मात्रै मतदान भएका उहाँले बताउनुभयो । यस्तै, मकवानपुरको हेटौंडा उपमहानगरको वडा नम्बर ४, ५, ६, ७, १०, १७, १८ लगायतका वडामा नेतृत्व सर्वसम्मत चयन भएका छन् । हेटौंडा–१, २, ५, ८ र ९ नम्बर वडामा मतदान भएको छ । आइतबार राति अबेरसम्म निर्वाचन सम्पन्न भई नतिजा घोषणा हुने उहाँले बताउनुभयो ।
हेटौंडा–४ को सभापतिमा पौडेल
आइतबार बिहानैदेखि सुरु भएको अधिवेशनबाट हेटौंडा उपमहानगरपालिका ४ नम्बर वडा समिति सभापतिमा हरिप्रसाद पौडेलको नेतृत्वमा वडा समिति र २७ जना प्रतिनिधि सर्वसम्मत चयन भएका छन् । वडा सभापति चयन हुनुभएका पौडेल २०७४ सालको स्थानीय निर्वाचनमा कांग्रेसबाट वडा अध्यक्षका उम्मेदवार रहनुभएको थियो । पार्टीमा गरेको मिहिनेतको मूल्यांकन गर्दै सर्वसम्मत वडामा पार्टीको नेतृत्व र क्षेत्रीय प्रतिनिधि चयन गर्न क्रियाशील सदस्यहरुबाट साथ पाएको पौडेलको भनाई छ ।
हेटौंडा–४ स्थित क्वीक २० पार्टी प्यालेसमा भएको अधिवेशनबाट पौडेल नेतृत्वको वडा समितिको उपसभापतिमा अर्जुनप्रसाद देवकोटा र इन्दिरा कोइराला, सचिवमा विजय कार्की र रमेश मुडभरी, सहसचिवमा कृष्णप्रसाद प्रसाई र रामेश्वर पराजुली सर्वसम्मत चयन हुनुभएको निर्वाचन अधिकृत प्रद्युम्न उपाध्यायले जानकारी दिनुभएको छ । यस्तै क्षेत्रीय प्रतिनिधि २७ जना पनि सर्वसम्मत चयन भएका छन् । ४ नम्बर वडामा नेपाली कांग्रेसको सक्रिय सदस्य दुई सय ८८ जना छन् ।
हेटौंडा–५ मा यमबहादुर
हेटौंडाः नेपाली कांग्रेसको जारी अधिवेशनबाट हेटौंडा–५ को वडा सभापतिमा दोस्रो कार्यकालका लागि यमबहादुर श्रेष्ठ सर्वसम्मत चयन हुनुभएको छ । हेटौंडा–५ स्थित बालकुमारी पार्टी प्यालेसमा भएको वडा अधिवेशनबाट उपसभापतिमा विजय पुडासैनी र भवानी शंकर चौलागाई चयन हुनुभएको छ ।
अधिवेशनबाट सचिवमा सागर सापकोटा र कमल राई, सहसचिवमा राधिका भट्टराई र शिवराम निरौलासहित २१ सदस्यीय वडा समिति चयन भएको छ । यस्तै १६ जना क्षेत्रीय प्रतिनिधिमध्ये आरक्षणतर्फ सर्वसम्मत निर्वाचित भएका छन् भने खुलातर्फ ६ जना क्षेत्रीय प्रतिनिधि चयन गर्न निर्वाचन भएको थियो । ११ जना आकांक्षी भएपछि निर्वाचन गर्नुपरेको हो । हेटौंडा–५ मा कांग्रेसका दुई सय १५ जना क्रियाशील सदस्यले अधिवेशनमा भाग लिएका छन् ।
हेटौंडा–१० सभापतिमा लामा
नेपाली कांग्रेसको १४ औं महाधिवेशनअन्तर्गत् वडा अधिवेशनबाट हेटौंडा–१० को सभापतिमा युवराज लामा सर्वसम्मत निर्वाचित हुनुभएको छ । आइतबार बिहान हेटौंडा–१० स्थित दर्शन पार्टी प्यालेसमा भएको वडा अधिवेशनबाट उपसभापतिमा बासु न्यौपाने र कमला दोङ, सचिवमा सुदेशकुमार श्रेष्ठ र कुसुम राई, सहसचिवमा रामबाबु साह र देवलाल श्रेष्ठसहित २५ सदस्यीय वडा समिति चयन गरिएको हो ।
यस्तै अधिवेशनबाट क्षेत्रीय प्रतिनिधिमा १९ जना सर्वसम्मतरुपमै चयन भएका छन् । वडा अधिवेशनमा नेपाली कांग्रेसका एक सय ६४ जना क्रियाशील सदस्य सहभागी थिए ।
हेटौंडा–१२ मा गोले सर्वसम्मत
नेपाली कांग्रेसको जारी वडा अधिवेशनबाट हेटौंडा–१२ को वडा सभापतिमा सुदर्शन गोले सर्वसम्मत निर्वाचित हुनुभएको छ । गोलेको नेतृत्वमा उपसभापतिमा शम्भु तिवारी र बलबहादुर मिजार, सचिवमा दीपक सिंह घलान र राजेन्द्रप्रसाद पुडासैनी, सहसचिवमा बसन्त थोकर र केवल न्यौपानेसहितको वडा समिति चयन भएको छ । यस्तै १७ सदस्यीय क्षेत्रीय प्रतिनिधि पनि चयन गरिएको छ ।
हेटौंडा–१६ मा दंगाल
नेपाली कांग्रेस हेटौंडा–१६ को सभापतिमा सोमनाथ दंगाल चयन हुनुभएको छ । १६ नम्बर वडाको उपसभापतिमा केदारनाथ आचार्य र कृष्णप्रसाद बस्ताकोटी, सचिवमा गुरुप्रसाद ढकाल, सहसचिवमा सन्तो धिमाल र पुस्कल पौडेललगायत २२ सदस्यीय वडा समिति चयन भएको छ ।
हेटौंडा–१८ मा बानियाँ
हेटौंडा–१८ मा सहमतिमा पदाधिकारी चयन भएको छ । नेपाली कांग्रेसको वडा अधिवेशनबाट राजेन्द्रराज बानियाँ सभापतिमा चयन हुनुभएको छ । यसैगरी उपसभापतिमा पुरुषोत्तमराज गुरागाईं र गोकर्ण सुवेदी, सचिवमा योगराज खतिवडा र बेञ्जन थापा, सहसचिवमा मनिल थापा र रजनी श्रेष्ठ चयन हुनुभएको छ ।
यस्तै महिला सदस्य ५ जनासहित २५ जनाको वडा समिति सहमतिमा चयन गरिएको कांग्रेस निकट सुजन पण्डितले जानकारी दिनुभयो । हेटौंडा–१८ मा कांग्रेस मकवानपुरका सभापति ईन्द्रबहादुर बानियाँको पनि उपस्थिति रहेको थियो । उहाँले सर्वसम्मत नेतृत्व चयन भएकोमा सम्पूर्ण पदाधिकारीलाई बधाईसमेत दिनुभएको छ ।
बकैयाका २३ वर्षीय ब्राम्ह वडा सभापति
मकवानपुर जिल्लाको बकैया गाउँपालिका वडा नम्बर १ मा नेपाली कांग्रेसको सभापतिमा २३ वर्षीय बुद्ध ब्राम्ह सर्वसम्मत निर्वाचित हुनुभएको छ । उपसभापतिमा कामी सिं मोक्तान, लेखतबहादुर मोक्तान, सचिवमा सोमबहादुर सिंजाली, सहसचिवमा लालबहादुर गोले र देउमान जिम्बा चयन हुनुभएको छ ।
यसैगरी महिला सदस्यमा लालीमाया स्याङ्तानसहित २२ जनाको वटा समिति सर्वसम्मत चयन भएका छन् । बकैया गाउँपालिका वडा नम्बर १ मा यो वर्ष ४६ जनाले क्रियाशीत सदस्यता पाएका थिए ।
बकैयाको ३ वडामा विवाद
मकवानपुरको बकैया गाउँपालिकाको १२ वडामध्ये ३ वडामा विवाद भएको कांग्रेस बकैया गाउ“पालिकाका सभापति भूमिनन्दन गौतमले बताउनुभयो । उहाँका अनुसार बकैया गाउँपालिकाको वडा नम्बर ६, ७ र १० मा कांग्रेस क्रियाशील सदस्यहरुको घम्साघम्सी परेको थियो । यस्तै वडा नम्बर १, २, ३, ४, ५, ८, ९, ११ र १२ मा भने सहमतिमा वडा समिति चयन भएका छन् ।
सबै वडामा निर्वाचन सम्पन्न भएको उहाँले बताउनुभयो । बकैया–१ मा बुद्ध ब्राम्ह सभापति बन्नभएको छ । वडा नम्बर २ को सभापतिमा चन्द्रबहादुर जिम्बा, बकैया–३ मा भक्तबहादुर भ्लोन सभापति बन्नुभएको छ । ४ नम्बर वडा सभापतिमा सुनिल भोम्जन, ५ नम्बर सभापतिमा अमृत थिङ, ८ नम्बर सभापतिमा ईन्द्रबहादुर दोङ, ९ नम्बर सभापतिमा तीर्थलाल रुम्बा, ११ नम्बर वडा सभापतिमा ईन्द्रबहादुर स्याङ्तान र १२ नम्बर वडा सभापतिमा थिङबहादुर रुम्बा चयन हुनुभएको छ ।
गढीको सबै वडामा अधिवेशन
मकवानपुरगढी गाउँपालिकाका सबै वडामा नेपाली कांग्रेसको अधिवेशन सम्पन्न भएको छ । आइतबार सबै वडामा नयाँ समिति गठन तथा क्षेत्रिय प्रतिनिधि चयनको प्रक्रिया पूरा भएको छ ।
अधिवेशनबाट मकवानपुरगढी गाउँपालिकाको १ नम्बर वडा सभापतिमा सूर्य बहादुर स्याङ्तान, २ नम्बर वडा सभापतिमा राम प्रसाद पुडासैनी, ३ नम्बर वडा सभापतिमा बिजय लामा थोकर, ४ नम्बर वडा सभापतिमा सुवास सापकोटा, ५ नम्बर वडा सभापतिमा दीपेश दहाल, ६ नम्बर वडा सभापतिमा प्रल्हाद चौलागाईं, ७ नम्बर वडा सभापतिमा सुनराज स्याङ्तान र ८ नम्बर वडा सभापतिमा बेदनाथ न्यौपाने चयन हुनुभएको छ ।
