हेटौंडाः नेपाल कम्युनिष्ट पार्टी एमाले केन्द्रीय सदस्य तथा मकवानपुरका पार्टी इन्चार्ज रामेश्वर रानाले एमालेलाई अहिले चौतर्फी घेराबन्दी भएको बताउनुभएको छ । उहाँले एमालेलाई भएको चौतर्फी घेराबन्दीलाई तोड्न काम सुरु भइसकेको पनि बताउनुभयो । आइतबार माओवादी केन्द्र र कांग्रेस परित्याग गरी एमालेमा प्रवेश गरेकाहरुलार्ई रानाले स्वागत गर्दै गाउँ–गाउँमा पार्टी कमिटी गठन गर्ने अभियानमा एमाले अघि बढिसकेको बताउनुभयो ।
मकवानपुरको राक्सिराङ वडा नम्बर ६ र ८ का ७ जना युवाहरु कांग्रेस र माओवादी पार्टी परित्याग गरेर एमाले प्रवेश गरेका हुन् । आइतबार नेकपा एमाले मकवानपुरको पार्टी कार्यालय हेटौंडामा नेकपा एमालेका केन्द्रीय सदस्य रामेश्वर राना, प्रदेश संगठन प्रमुख तथा संविधानसभा सदस्य अनन्त पौडेल र जिल्ला अध्यक्ष एकलाल श्रेष्ठले उनीहरुलाई पार्टीमा स्वागत गरेका थिए ।
सविधानसभा सदस्य अनन्त पौडेलले नेपालको राजनीतिक अवस्था तरलतापूर्ण भएको बताउनुभयो । उहाँले जुन उद्देश्यले संविधान निर्माण भएको हो, त्यसो नभएर संविधानको दुरुपयोग भएको बताउनुभयो । अदालतबाट प्रधानमन्त्री छान्ने खेल सुरु भएको भन्दै अहिले केन्द्रमा बनेको बाम गठबन्धन धेरै नटिक्ने दाबी गर्नुभयो ।
नेकपा एमाले सरकारमा नभएपनि पार्टी प्रवेश गर्नेहरुको लर्का भएको बताउनुभयो । नेकपामा अहिले देखिएको जनविश्वासलाई जनतासम्म पनि कायम राख्नुपर्ने उहाँले बताउनुभयो । विगतदेखि नै आम जनता र कार्यकताबीच सम्बन्ध नङ र मासु, पानी र माछाजस्तै भएकाले जनतामा एमालेप्रति विश्वास भएको बताउनुभयो ।
स्थानीय तहको चुनावको तयारीमा एमाले लागिसकेकाले पूर्व–पश्चिम। उत्तर–दक्षिण सबैतिर पार्टी प्रवेश तथा कमिटी निर्माण भइसकेको बताउनुभयो । उहाँले अब नेकपामा प्रवेश गरेसँगै सबै एकै नदीमा मिसिएकाले कुनै विभेद नहुने भन्दै रुचि र योग्यताका आधारणमा पार्टीको जिम्मेवारी पनि दिइने बताउनुभयो । नेकपा एमाले मकवानपुरका अध्यक्ष एकलाल श्रेष्ठले भने आफ्नो गाउँ आफै बनाउनुपर्ने बताउनुभयो । युवाहरुलाई निस्वार्थ पार्टीको काममा लाग्न उहाँले आग्रह गर्नुभयो ।
एमालेमा प्रवेश गरेका पूर्वमाओवादी केन्द्रका सञ्चबहादुर प्रजाले राक्सिराङ–८ मा अब माओवादीले कब्जा गर्न नसक्ने बताउनुभयो । माओवादीमा लामो समय बिताएका प्रजाले दिगो राजनीति गर्नका लागि पार्टी प्रवेश गरेको बताउनुभयो । राक्सिराङ–८ का युवाहरु सबैलाई एमालेमा प्रवेश गराउने उहाँको भनाई छ । विगतमा माओवादीको धेरै पदमा रहेर काम गर्दा गाउँको विकासमा टेवा पुर्याउन नसकेको भन्दै अब नेकपाको बलियो पकडको क्षेत्र बनाउन आफू लागिपर्ने उहाँले बताउनुभयो ।
