हेटौंडाः बागमती प्रदेशका मुख्यमन्त्री डोरमणि पौडेलले प्रदेशको हरेक क्षेत्रको विकास क्रमिकरुपमा हुँदै जाने बताउनुभएको छ । शनिबार मकवानपुरको मकवानपुरगढी गाउँपालिका वडा नं. ५ मा निर्माण भएको ज्यामिरे खोला पुल उद्घाटन गर्नुहुँदै उहाँले प्राथमिकताका आधारमा बजेट विनियोजन गरी काम भइरहेको बताउनुभयो ।
मुख्यमन्त्री पौडेलले हालसम्म प्रदेश सरकारले ६२ वटा पुल निर्माणको काम गरिसकेको बताउनुभयो । विकास भनेको एकै रातमा नहुने बताउनुहुँदै उहाँले साढे तीन वर्षअगाडि स्थापना भएको प्रदेश सरकारले चारसय किलोमिटर पक्की सडक निर्माण गरिसकेको भन्नुभयो । विकासका काम कहिले पनि नटुङ्गिने कुरा राख्नुहुँदै उहाँले ठूला मुलुकमा पनि विकासको काम अझै पनि नसकिएको उदाहरण प्रस्तुत गर्नुभयो ।
अहिलेको अवस्थामा सबै क्षेत्रमा विकासले गति लिएको उहाँले बताउनुभयो । अझै आफूहरुले नेतृत्व लिएका स्थानमा विकासले धेरै गति लिएको उहाँले दावी गर्नुभयो । कृषि क्षेत्रमा प्रदेश सरकारले धेरै काम गरेको पनि उहाँले बताउनुभयो । यस क्षेत्रमा उत्पादन गरेका वस्तुलाई बजारसम्म लैजान सकिएन भने सडकको महत्व नहुने मुख्यमन्त्री पौडेलको भनाई रहेको छ । बिगतका सरकारले गर्न नसकेको काम पनि एमाले नेतृत्वको सरकारले गरेको उहाँले दावी गर्नुभयो ।
कार्यक्रममा मकवानपुरगढी गाउँपालिकाका अध्यक्ष बिदुर हुमागाईंले पुल निर्माण भएपछि यात्रा एवम् कृषि उपज निकासी गर्न यस क्षेत्रमा धेरै सहज भएको बताउनुभएको छ । पहिलेको तुलनामा यस क्षेत्रमा अहिले धेरै विकास भएको उहाँले बताउनुभयो ।
ज्यामिरे खोलाको पक्की पुल ३ करोड ११ लाख रुपैयाँ लागतमा निर्माण भएको हो । संघीय सरकारबाट ८९ लाख ६४ हजार ३ सय १९ रुपैयाँ, बागमती प्रदेश सरकारबाट ३० लाख रुपैयाँ अनुदान र गाउँपालिकाको आन्तरिक स्रोतबाट २ करोड १८ हजार १ सय ६९ रुपैयाँ गरी कुल ३ करोड १९ लाख ८२ हजार ४ सय ८८ रुपैयाँ लागतमा पुल निर्माण भएको हो । निर्माण भएको पुलको लम्बाइ २६.६५ मिटर र चौडाइ ७.२० मिटर छ ।
पुल निर्माणपछि गाउँपालिकाका वडा नं. ५ र ६ का बासिन्दा लाभान्वित भएका छन् । यसअघि वर्षायाममा उर्लिएको भेलमा जोखिमपूर्ण तरिकाले ज्यामिरे खोलामा वारपार गर्नुपर्ने बाध्यता थियो ।
