हेटौंडाः मकवानपुरमा अहिले फेरि कोरोना संक्रमण दर बढ्दै गएको छ । स्वास्थ्य कार्यालय मकवानपुरले सार्वजनिक गरेको पछिल्लो दैनिक विवरणअनुसार कोरोनाको संक्रमण दर फेरि बढ्न थालेको हो ।
जिल्लामा २०७८ वैशाख २० लागू गरिएको निषेधाज्ञा अहिलेसम्म जारी छ । जारी निषेधाज्ञाको अवधि यहि साउन १४ गते बिहीबार सकिँदैछ । निषेधाज्ञा जारी रहे पनि सबै प्रकारका सेवा निश्चित समयसम्म सञ्चालन भइरहको छ । सबै सरकारी कार्यलयबाट उपलब्ध हुने सेवाहरु, यातायात सेवाहरु, विभिन्न दैनिक उपभोग्य सामान बिक्री वितरणलगायतका सेवाहरु चलिरहेको छ । तर धेरैजसोले स्वास्थ्य मापदण्डको पालना गरेको अवस्था देखिँदैन । जिल्लाभित्रका क्याम्पसहले अहिले जारी निषेधाज्ञाको बिचमा पनि परीक्षाहरु सञ्चालन गरिरहेका छन् । तर स्वास्थ्य मापदण्ड पालना गर्न र गराउन नसकेको पाइएको छ । जौखिमकै अवस्थामा पनि विद्यार्थीहरु बाहिर जिल्लाबाट परीक्षाका लागि दिनानुदिन हेटौंडा भित्रिएका छन् ।
जिल्लामा केहि समयदेखि कोरोना परीक्षण दरमा कमी आएको छ भने संक्रमण दर वृद्धि हुँदै गएको छ । जिल्लामा पछिल्लो २४ घण्टामा ८२ जनामा कोरोना भाइरस संक्रमण पुष्टि भएको छ । यो संक्रमण दर साउन महिनाको १ गतेदेखिकै उच्च हो । एक सय ७९ जनाको पीसीआर परीक्षण गर्दा ६९ जनामा र ५३ जनाको एन्टिजेन परीक्षण गर्दा १३ जनामा कोरोना भाइरस संक्रमण पुष्टि भएको हो ।
कोरोना पुष्टि हुनेमा हेटौंडा उपमहानगरपालिकाका मात्रै ६३ जना रहेका छन् । यस्तै थाहा नगरपालिकाका ७ जना, मकवानपुरगढी गाउँपालिकाका ३ जनामा कोरोना पुष्टि भएको छ । बागमती गाउँपालिकाका २ जनामा, मनहरी गाउँपालिकाका ४ जनामा, भीमफेदी गाउँपालिकाका २ जनामा र बकैया गाउँपालिकाका १ जनामा कोरोना पुष्टि भएको स्वास्थ्य कार्यालय मकवानपुरले जनाएको छ ।
योसँगै जिल्लामा कोरोना पुष्टि हुनेको कुल संख्या १२ हजार ६ सय ६३ जना पुगेको छ । पछिल्लो २४ घण्टामा ७१ जना कोरोना संक्रमणमुक्त भएका छन् । योसँगै कोरोना संक्रमणमुक्त हुनेको कुल संख्या ११ हजार ९ सय १७ जना पुगेको छ । यो अवधिमा कोरोना संक्रमणका कारण कसैको पनि ज्यान गएको छैन । जिल्लामा हालसम्म १ सय ४० जनाले कोरोना संक्रमणका कारण ज्यान गुमाइसकेका छन् ।
जिल्लामा अहिले ५ सय ६१ जना सक्रिय संक्रमितहरु रहेका छन् । जसमध्ये होम आइसोलेसनमा ५ सय १२ जना र ४९ जना संस्थागत आइसोलेसनमा रहका छन् ।
जिल्लामा अहिलेसम्म कोभिड–१९ विरुद्धको पहिलो मात्राको भेरोसेल खोप ३२ हजार ३ सय ६८ जनाले लगाएका छन् भने दोस्रो मात्राको भेरोसेल खोप ६ हजार १ सय ५० जनाले मात्र लगाएका छन् । यस्तै कोभिड–१९ विरुद्धको पहिलो मात्राको कोभिशिल्ड खोप २१ हजार ६ सय ६३ जनाले र दोस्रो मात्राको कोभिशिल्ड खोप ८ हजार ३ सय ७५ जनाले लगाएका स्वास्थ्य कार्यालय मकवानपुरले उपलब्ध गराएको तथ्यांकमा उल्लेख छ ।
जिल्लामा मंगलबारबाट जोन्सन एण्ड जोन्सन खोप पनि लगाउन सुरु गरिएको छ । जिल्लामा रहेका ५० देखि ५४ वर्षका नागरिकहरुलाई तथा वैदेशिक यात्रा गर्ने नागरिकहरुलाई प्राथमिकतामा राखेर यो खोप लगाउन सुरु गरिएको हो । यो खोप आज बुधबारसम्म मात्र लगाइनेछ ।
