२०१९ इ.स.बाट विश्वभरि फैलिएको नयाँ कोरोना भाइरस संक्रमणबाट लागेको रोगलाई विश्व स्वास्थ्य संगठनले कोभिड–१९ को नाम दिएको छ । कोभिड–१९ सर्वप्रथम चीनको वुहानमा देखा परेको थियो । त्यसपश्चात् त्यहाँबाट विश्वभर फैलिन थालेको हो । यो रोगका भाइरस कोरोना एक परिवर्तित स्वरूपको भाइरस हो, जुन सिभियर एक्युट रेस्पिरेटोरी सिन्ड्रम (सार्स) र सामान्य प्रकारका रुघाखोकी सँग पनि सम्बन्धित रहेको छ । यो एक प्राणघातक भाइरस हो ।
कोभिड–१९ श्वासप्रश्वासको माध्यमबाट सर्ने रोग हो । यो संक्रमित व्यक्तिले खोक्दा वा हाच्छिउँ गर्दा नाक वा मुखबाट निस्कने छिटाको माध्यमद्वारा एक व्यक्तिबाट अर्को व्यक्तिमा सर्ने हुँदा हामीले बाहिर निस्कँदा मास्क तथा सेनिटाइजरको प्रयोग गर्नुपर्छ ।
कोभिड–१९ नेपालमा मात्र नभएर विश्वभर रहेको छ । यसले नेपालका विभिन्न क्षेत्रमा असर पुर्याएको छ, जसमध्ये शिक्षा क्षेत्र पनि एक हो । कोभिड–१९ ले गर्दा देशका सम्पूर्ण सरकारी तथा निजी विद्यालयहरु बन्द गर्नु पर्ने समस्या आइपर्यो । यसो हुँदा विद्यालय शिक्षामा कोभिड–१९ ले निकै नै असर पारेको छ ।
कोभिडले गर्दा विद्यार्थीहरूले उचित शिक्षा प्राप्त गर्न सकिरहेका छैनन् । सहरका विद्यार्थीहरूले जसोतसो भौतिक उपस्थितिबिना हुने अध्ययन गर्न पाइरहेका छन् तर गाउँका विद्याथीहरूले भने त्यही शिक्षा पनि हासिल गर्न पाइरहेका छैनन् । त्यतिमात्र नभएर भौतिक उपस्थितिबिना नै हुने पढाइ भौतिक उपस्थितिमा हुने पढाइजस्तो प्रभावकारी भने भइरहेको छैन ।
भौतिक उपस्थितिमा हुने पढाइमा र भौतिक उपस्थितिविना नै हुने पढाइमा पनि निकै फरक रहेको छ । जस्तैः भौतिक उपस्थितिमा हुने पढाइमा दिनमा सबै विषय अध्ययन गर्न पाइन्थ्यो भने भौतिक उपस्थितिविना नै हुने पढाइमा कतिपय दिनमा केही विषय मात्र अध्ययन गर्न पाइन्छ । कोभिड–१९ ले गर्दा विद्याथीहरू विद्यालय जान पाइरहेका छैनन् । विद्यालयमा प्रदान गरिने शिक्षा प्राप्त गर्न सकिरहेका छैनन् । विद्याथीहरूले परीक्षा दिन पाएनन् । त्यसो हुँदा उनीहरूको परीक्षाबिना नै नतिजा प्रकाशन गर्नुपर्ने भयो । विद्याथीहरूलाई घरमै बसेर मोबाइल, टिभी, ल्यापटप चलाउने बानी पर्न थालिसक्यो । विद्याथीहरूले पढाएका जति सबै बिर्सिने स्थिति पनि पैदा भइसकेको छ ।
यदि कोभिड–१९ को अन्त्य हुनासाथ विद्यालय खुल्ने सम्भावना धेरै नै रहेको छ र हामीले भौतिक उपस्थितिमा हुने पढाइ पनि प्राप्त गर्न सक्ने छौँ । त्यसका लागि हामी सम्पूर्ण नेपालीहरूले मास्क र सेनिटाइजरको पयोग गर्नुका साथै सरकारले लागु गरेको सम्पूर्ण स्वास्थ्य नियमको पालना गर्ने गर्नुपर्दछ ।
