हेटौंडाः बागमती प्रदेशको आन्तरिक मामिला तथा कानुन मन्त्री केशवराज पाण्डेले प्रदेश सरकारको मातहतमा प्रहरी संगठन नआएको महशुस नै नभएको बताउनुभएको छ । प्रदेश प्रहरीसँग समन्वय गरेर काम गर्दा यस्तो महुशस नभएको उहाँले बताउनुभएको हो । बागमती प्रदेशले प्रदेश प्रहरीलाई १ अर्बभन्दा बढी लगानी गरिसकेको छ ।
प्रदेशको खर्चमा ४६ वटा प्रहरी चौकिको आधुनिक भवन निर्माण सम्पन्न भएको छ भने थप २१ वटा प्रहरी चौकि भवन निर्माण हुँदैछ । यस्तै प्रहरीलाई सवारी तथा प्रविधिको लागि बागमती प्रदेश सरकारले रकम खर्चर्दै आएको छ । तर प्रदेश सरकार मातहतमा प्रदेश प्रहरी आएको छैन ।
शुक्रबार मन्त्री पाण्डेले बागमती प्रदेशको प्रहरी प्रमुख डिआइजी बसन्त कुमार लामालाई झण्डै ४ करोडको सवारी हस्तान्तरण गर्नुभयो । प्रदेश प्रहरी कार्यालय मातहतको १० जिल्लाका प्रहरी कार्यालयलाई १२ थान ४ पाङ्ग्रे पिक अप भ्यान र १६ थान मोटरसाइकल हस्तान्तरण भएको हो । बागमती प्रदेश मातहतका दुर्गम स्थानका प्रहरी कार्यालयहरुमा पुरानो गाडिहरु भएको हुँदा नयाँ खरिद गरेर हस्तान्तरण गरेको मन्त्री पाण्डेले बताउनुभयो ।
उहाँले प्रदेश सरकारले अझै नयाँ सवारीहरु खरिद गरेर प्रदेशका प्रहरीलाई दिने बताउनुभयो । यसले निर्वाचनमा समेत प्रहरीलाई सहयोग पुग्ने मन्त्री पाण्डेले दाबी गर्नुभएको छ । प्रहरीलाई प्रविधि र यातायात दुवै क्षेत्रमा बलियो बनाउनुपर्ने मन्त्री पाण्डेले बताउनुभयो । प्रदेश सरकारले चालू वर्षदेखि नै प्रदेश छिर्ने नाकाहरुमा डिजिटल चेकप्वान्ट निर्माण गर्ने, ड्रोन खरिद गर्ने योजना बनाएको जानकारी गराउनुभयो ।
मन्त्रालयले शुक्रबार प्रहरीलाई २८ थान नयाँ सवारी दिएको हो । मन्त्रालयले ३ करोड ५३ लाख २७ हजार ९ सय ८८ रुपैयाँमा १२ थान पिक अप भ्यान र १ सय ५० सिसिको १६ थान पल्सर मोटरसाइकल ३७ लाख ३६ हजारमा खरिद गरेर बागमती प्रदेश प्रहरी कार्यालय हेटौंडाका प्रमुखलाई प्रदान गरेको हो । यसैबिच आन्तरिक मामिला तथा कानुन मन्त्रालयले हालै सरुवा भएका बागमती प्रदेशको डिआइजी बसन्त कुमार लामा, प्रहरी वरिष्ठ उपरीक्षक मिरा चौधरीलाई बिदाई समेत गरेको छ ।
