हेटौंडाः मकवानपुरको विकट कैलाश गाउँपालिकालाई स्वास्थ्य सामग्री सहयोग गरिएको छ । आइतबार हेटौंडा–११ स्थित ग्रामीण असहाय बालबालिका सामुदायिक पुनःस्थापना केन्द्र (रुहेल सिआरसी) ले एक थान अक्सिजन कन्सन्ट्रेटर र १० थान पिपिई सहयोग गरेको हो ।
रुहेल सिआरसीकी अध्यक्ष सुमित्रा काफ्लेले कैलाश गाउँपालिकाकी उपाध्यक्ष सुकुमाया थिङलाई सहयोग सामग्री हस्तान्तरण गर्नुभएको हो । गाउँपालिकाबाट सहयोगका लागि अनुरोध भएबमोजिम सहयोग गरिएको रुहेल सिआरसीले जनाएको छ । सहयोग सामग्री हस्तान्तरणका लागि रुहेल सिआरसीका कोषाध्यक्ष गुणराज पाठक, सदस्य अजिता कटुवाल पनि सहभागी हुनुहुन्थ्यो ।
यसअघि शनिबार सांग्रिला डेभलपमेन्ट एशोसिएशनले पनि कोभिड महामारी रोकथाम तथा संक्रमितहरुको उपचारका लागि स्वास्थ्य सामग्री हस्तान्तरण गरेको थियो । सांग्रीलाले अक्सिमिटर २५ थान, १० लिटर क्षमताको अक्सिजन सिलिण्डर ५ वटा, २० लिटर क्षमताको अक्सिजन सिलिण्डर ३ वटा, ४० लिटर क्षमताको अक्सिजन सिलिण्डर २ वटा, एन्टीजेन टेस्ट किट पा“च सय, थर्मल गन ६ थान, सहित पिपिई, सनिटाइजर, ह्याण्डवासलगायतका सामग्री हस्तान्तरण गरेको गाउँपालिकाका अध्यक्ष टंक मुक्तानले जानकारी दिनुभएको छ ।
