हेटौंडाः बागमती प्रदेशको आगामी आर्थिक वर्षको नीति तथा कार्यक्रम आज बिहीबार सार्वजनिक गरिदै छ । सत्तारुढ दल नेकपा एमाले बाहेकका अन्य दलहरु माओवादी, कांग्रेस, विवेकशील, जसपा, नेमकिपाले मोर्चाबन्दी गरेका छन् । विपक्षी सांसदहरुले आगामी वर्षको नीति तथा कार्यक्रम जनमुखी, कोभिड–१९ केन्द्रित व्यवस्थित र सन्तुलन हुनुपर्नेमा जोड दिएका छन् । तर विपक्षी दलहरुको सुझाव सरकारले आगामी नीति तथा कार्यक्रममा समावेश गरेको छ कि छैन आजै थाहा हुनेछ ।
बागमती प्रदेशसभाको प्रमुख प्रतिपक्षी दल माओवादी केन्द्रका नेता शालिकराम जम्कट्टेलले ९ पन्ने सुझाव आगामी नीति तथा कार्यक्रममा समावेश गर्न मुख्यमन्त्री डोरमणि पौडेललाई पेश गर्नुभएको थियो । उहाँले प्रदेशको गौरवको आयोजना काठमाडौं–हेटौंडा सुरुङमार्ग र विद्युतीय बस खरिदलाई नीति तथा योजनामा समावेश नगर्न सुझाव दिनुभएको थियो । तर प्रदेश सरकारले यी सुझावहरुलाई नीति तथा कार्यक्रममा समावेश गर्ने संकेत देखिएको छैन ।
सुरुङमार्ग निर्माणको कुनै औचित्य नभएको भन्दै सुझाव पेश गरेसँगै नेकपा माओवादी केन्द्रको हेटौंडामा चौतर्फी आलोचना सुरु भएको छ । हेटौंडाका रमेश देवकोटाले विकासको गतिलाई रोक्न नहुने बताएका छन् । सुरुङमार्ग आजको आवश्यकता हो’, देवकोटाले भने । सुरुङमार्ग, एप्रोच सडक र तीनवटा पुल निर्माण गर्न १८ अर्ब ७ करोड रुपैया“ खर्च लाग्ने अनुमान गरिएको छ । यो वर्षको अन्त्यसम्ममा परामर्शदाता र निर्माण कम्पनी छनोट गरिसक्ने भौतिक पूर्वाधार विकास मन्त्रालयका प्रवक्ता नविन सिंहले जानकारी दिनुभयो । असार १५ गतेसम्म छनौट भएको ६ वटा परामर्शदतामध्ये एक छनौट हुने उहाँले बताउनुभयो ।
सुरुङमार्गको सम्पूर्ण तयारी अन्तिममा पुगेको भन्दै बजेट सार्वजनिक भएपछि टेन्डर आव्हान हुने उहाँको भनाई छ । भीमफेदी गाउँपालिका र ईन्द्रसरोवर गाउँपालिका–२ कुलेखानी जोड्ने ३.२ किलोमिटर लम्बाईको दुई लेनको सुरुङमार्ग निर्माण हुनेछ । सुरुङमार्ग निर्माणका लागि टेण्डर हुने अन्तिम तयारीमा पुगेकोले सरकार यसबाट ब्याक नहुने देखिएको छ । आर्थिक मामिला तथा योजना मन्त्री कैलाश ढुंगेलले सुरुङमार्गलाई नीति तथा कार्यक्रममा समावेश नगर्न सुझाव दिएको बारे जानकारी नै नभएको प्रतिक्रिया दिनुभएको छ । प्रदेश सरकारले विद्युतीय बस खरिद प्रक्रिया पनि नरोक्ने देखिएको छ । अन्य सुझावहरु भने विपक्षी दलको समावेश भएर नीति तथा कार्यक्रम सार्वजनिक हुने सम्भावना छ ।
यता प्रमुख प्रतिपक्षी दलका नेता शालिकराम जम्कट्टेलले बजेटबारे पूर्ण छलफल नभई पास गर्न नदिने बताउनुभएको छ । उहाँले सुरुङमार्ग निर्माण गर्न बजेट विनियोजन गर्न नहुने तर्क गर्नुभयो । उहाँले आफ्नो दलले दिएको सुझाव नीति कार्यक्रम र बजेटमा समावेश भएर नआएमा आगामी बजेट पास नगर्ने चेतावनी दिनुभएको छ ।
