हेटौंडाः बागमती प्रदेशसभा सदस्य सन्त बहादुर चेपाङले मकवानपुरको मनहरीमा पोष्टमार्टम गर्ने व्यवस्था मिलाइदिन प्रदेशको सामाजिक विकास मन्त्री सरस्वती बस्नेसँग माग गर्नुभएको छ । आगामी वर्षको नीति, कार्यक्रम र बजेटमा समावेश गरी मनहरीको अस्पतालमा पोष्टमार्टम गर्ने ल्याब र जनशक्ति व्यवस्थापन गर्न उहाँले माग गर्नुभएको हो ।
मकवानपुरको विकट मानिने राक्सिराङ गाउँपालिका, मनहरी गाउँपालिका र कैलाश गाउँपालिका तीनै स्थानीय तहलाई पायक हुनेगरी मनहरीमा पोष्टमार्टम गर्ने ल्याब स्थापना र जनशक्ति व्यस्थापन गर्न सामाजिक विकास मन्त्रालयको ध्यानाकर्षण गराइएको छ ।
मकवानपुरमा शव पोष्टमार्टम गर्न दुर्गमका नागरिकहरु पनि हेटौंडा अस्पतालमा आउनुपर्ने बाध्यता छ । जिल्लाभर अन्य स्थानमा पोष्टमार्ट हुने व्यवस्था नभएको हेटौंडा अस्पतालका मेडिकल सुपरिटेण्डेण्ट रामचन्द्र सापकोटाले बताउनुभयो । वार्षीक रुपमा मकवानपुरकोे राक्सिराङमा दुर्घटना, विषादी च्याउ खाएर, पहिरो लगायतमा परेर सरदर १५ जनाको मृत्यु हुँदै आएको छ । उनीहरुको अकालमा मृत्यु हुँदा पोष्टमार्टमको लागि हेटौंडा अस्पताल ल्याउनुपर्ने बाध्यता छ । यो बाध्यता मनहरीको मात्र भने होइन । मकवानपुरका पूर्वमा रहेको बागमती गाउँपालिकाको पनि समस्या उस्तै छ ।
हेटौंडाबाट राक्सिराङ पुग्न ६ देखि ७ घण्टा लाग्छ । अझ वर्खाको समयमा कुनै भवितब्य भइहालेमा बाटो बन्द हुन्छ । प्रहरी घटनास्थलमा पुग्न दिनभर लाग्ने गरेको प्रहरी नायब उपरिक्षक जयश्वर रिमालले बताउनुभयो ।
प्रदेश सांसद सन्त चेपाङ मकवानपुरको राक्सिराङबाट प्रतिनिधित्व गर्ने सांसद हुन् । उहाँले आगामी वर्षमा बागमती प्रदेशको मकवानपुर, चितवन र धादिङ जिल्लामा चेपाङ उत्थान स्वास्थ्य शिक्षा कार्यक्रम ल्याउन सामाजिक विकास मन्त्री सरस्वती बस्नेतसँग माग गर्नुभएको छ ।
