हेटौंडाः मकवानपुरे फुटबल खेलाडी अञ्जन विष्टको कप्तानीमा रहेको ललितपुर सिटी फुटबल क्लबलाई पराजित गर्दै काठमाडौं रेजर्स फुटबल क्लब जारी खुकुरी नेपाल सुपर लिग (एनएसएल) को फाइनलमा प्रवेश गरेको छ । बिहीबार भएको एलिमिनेटर खेलमा काठमाडौंले ललितपुरलाई ३–० ले पराजित गर्दै फाइनलमा धनगढी एफसीसँगको भेट पक्का गरेको हो ।
लिगमा काठमाडौंले ललितपुरलाई लगातार दोस्रो पटक पराजित गरेको छ । यसअघि लिगको उद्घाटन खेलमा काठमाडौंले ललितपुरमाथि १–० को जित दर्ता गरेको थियो । त्रिपुरेश्वरस्थित दशरथ रंगशालामा बिहीबार भएको खेलमा काठमाडौंको जितमा मेसौको ओलुमोउले दुई तथा स्टेफन विनोङ समिरले एक गोल गरे ।
पहिलो हाफमा दुई तथा दोस्रो हाफमा एक गोल भएको थियो । खेलको १५ औं मिनेटमा ओलुमोउले पेनाल्टीमार्फत् गोल गर्दै काठमाडौंलाई १–० को अग्रता दिलाए । २२ औं मिनेटमा ओलुमोउले नै व्यक्तिगत दोस्रो गोल गर्दै काठमाडौंलाई २–० को अग्रता दिलाए ।
५९ औं मिनेटमा तेज तामाङको क्रसलाई स्टेफन विनोङ समिरले अफसाइड बिट ट्याप गर्दै गरेको प्रहार गोलमा परिणत हुँदा काठमाडौंले खेलमा ३–० को अग्रता लिएको थियो । काठमाडौंका आशीष गुरुङ खेलको इमर्जिङ खेलाडी घोषित भए । उनले १० हजार रुपैयाँ हात पारे । काठमाडौंकै ओलुमोउ खेलको प्लेयर अफ दि म्याच घोषित भए । उनले २५ हजारसहित ट्रफी हात पारे ।
धनगढीले काठमाडौंलाई प्लेअफको पहिलो खेलमा २–१ गोलले हराउँदै फाइनलमा स्थान पक्का गरिसकेको छ । फाइनल खेल जेठ १ गते हुनेछ । नेपाल स्पोर्टस म्यानेजमेन्टको आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ ।
प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैयाँ हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।
