हेटौंडाः बागमती प्रदेशको मुख्यमन्त्री डोरमणि पौडेलले शुक्रबार मदन भण्डारी स्वास्थ्य विज्ञान प्रतिष्ठान हेटौंडा अस्पताललमा संचालनमा आउन लागेको कोभिड–१९ उपचार कक्षको अवालोकन गर्नुभएको छ ।
शुक्रबार दिउँसोबाट संचालनमा ल्याइने उपचार कक्षको अवलोकन गर्दै मुख्यमन्त्री डोरमणि पौडेलले आवश्यक सामग्रीहरु तुरुन्त माग गर्न निर्देशन दिनुभएको छ । हेटौंडा अस्पतालमा १४ बेडको हाइ डिपेन्डेन्सी (एचडियू) बेड निर्माण गरेको छ । यस्तै ६ बेड हाइ फ्लो अक्सिनसहितको बेड निर्माण गरेर संचालन गर्न लागिएको कोभिड–१९ उपचार कक्षका प्रमुख डा.सागर काफ्लेले बताउनुभयो । हेटौंडा अस्पतालमा अहिले ६ भेन्टिलेटर रहेकामा ४ वटा प्रयोगमा आएका छन् । यस्तै १७ आइसियू बेड रहेको उहाँले जानकारी गराउनुभयो । हेटौंडा अस्पतालले ५० जनासम्म गम्भिर प्रकृतिका कोभिड–१९ का बिरामीहरुलाई उपचार दिन सक्ने भएको छ । अहिले १० जना उपचार कक्षमा उपचार गराइरहेका छन् ।
यसैगरी मुख्यमन्त्री डोरमणि पौडेलले शुक्रबार हेटौंडा–६ गौरिटारस्थित हेटौंडा उपमहानगरपालिकाले संचालन गरेको आइसोलेसन र मदन भण्डारी स्वास्थ्य विज्ञान प्रतिष्ठानको शैक्षिक गतिविधि संचालन गर्न तयार भइरहेको भवनको निरीक्षण गर्नुभएको छ । प्रतिष्ठानका रजिष्ट्रार राजेश प्रसाईले मुख्यमन्त्री पौडेललाई हेटौंडा अस्पतालको एचडियू कक्ष र गौरिटारमा बन्दै गरेको प्रतिष्ठानको शैक्षिक भवनहरुको बारेमा जानकारी गराउनुभएको थियो । अवलोकनमा मकवानपुरका प्रमुख जिल्ला अधिकारी भरतमणी पाण्डेको पनि सहभागिता रहेको थियो ।
