हेटौंडाः बागमती प्रदेशको पाँचौ प्रमुख सचिवको रुपमा संघीय सरकारका सचिव डा. मुकुन्दप्रसाद पौडेल आउनुहुने भएको छ । प्रदेशको मुख्यमन्त्री तथा मन्त्रिपरिषद् कार्यालयका प्रवक्ता रमेशकुमार उपाध्यायका अनुसार सम्भवत बिहीबारदेखि पौडेलले आफ्नो जिम्मेवारी सम्हाल्नुहुनेछ ।
यसअघि बागमती प्रदेशका प्रमुख सचिवको रुपमा डा. मानबहादुर बीकेले ९ महिना काम गर्नुभएको थियो । उहाँभन्दा अघि प्रदेशमा प्रमुख सचिवको रुपमा तोयम रायले ९ महिना, आनन्दराज ढकालले एक वर्ष र रेश्मिराज पाण्डेले ७ महिना कार्य गर्नुभएका थियो । पाण्डेले बागमती प्रदेशको प्रथम प्रमुख सचिवको रुपमा ७ महिना काम गर्नुभएको हो ।
बागमती प्रदेशमा गएको ३ वर्षमा प्रमुख सचिव र सचिवहरु परिवर्तन भइरहँदा प्रदेशको विकासमा ठूलो धक्का लागेको छ । संंघीयता कार्यान्वयन सुरु भएसँगै बागमती प्रदेशको प्रमुख सचिव पाँच जना परिवर्तन भएका छन् । उनीहरु एकै प्रदेशमा कम्तिमा पनि २ वर्ष टिक्न नसक्दा विकासका कामहरु प्रभावकारी हुन सकेको छैन ।
बागमती प्रदेशको मन्त्रालयगत अवस्था हेर्दा सचिवहरुको टर्नओभर धेरै भएको पाइन्छ । बागमती प्रदेशको सामाजिक विकास मन्त्रालयमा पनि गएको ३ वर्षमा आधा दर्जनभन्दा बढी सचिवहरु परिवर्तन भएका छन् । हालै मन्त्रालयमा सचिवको रुपमा यज्ञप्रसाद ढुंगेलल सरुवा भएर आउनुभएको छ । यसअघि सामाजिक विकास मन्त्रालयको सचिवमा दीपक काफ्लेले काम गर्नुभएको थियो । प्रदेशको सात मन्त्रालयमध्ये सामाजिक विकास मन्त्रालयमा सचिवहरुको धेरै ‘टर्नओभर’ भएको हो । मन्त्रीहरुले आफूअनुकूल सचिव रुचाउने भएका कारण पनि सचिवहरुको ‘टर्नओभर’ बढी देखिएको छ ।
यस्तै, बागमती प्रदेशको भौतिक पूर्वाधार विकास मन्त्रालयमा पनि ४ जना सचिवहरुले हालसम्म काम गरेका छन् । मन्त्रालयमा पहिलो सचिवको रुपमा जीवज मण्डलले काम गर्नुभएको थियो । त्यसपछि कौशल किशोर झा, तेजराज भट्ट र हाल सञ्जीव बरालले सचिवको जिम्मेवारी सम्हाल्दै हुनुहुन्छ । भौतिक पूर्वाधार विकास मन्त्रालयको पहिलो मन्त्रीको रुपमा केशव स्थापितले काम गर्नुभएको थियो भने उहाँलाई मुख्यमन्त्री डोरमणि पौडेलले बर्खास्त गरेसँगै दोस्रो मन्त्रीको रुपमा रामेश्वर फुयाँलले जिम्मवेवारी सम्हाल्नुभएको छ । यो मन्त्रालय प्रदेशको सातवटा मन्त्रालयमध्ये बढी बजेट विनियोजन हुने मन्त्रालय हो ।
यसैगरी प्रदेशको आन्तरिक मामिला तथा कानुन मन्त्रालयमा हाल चौथो सचिवका रुपमा मदन भुजेल कार्यरत रहनुभएको छ । यसअघि मन्त्रालयको सचिवको रुपमा बलदेवप्रसाद जोशी, राजकुमार श्रेष्ठ, विनोदप्रकाश सिंहले काम गर्नुभएको थियो । उहाँहरुले पनि मन्त्रालयमा ६ महिनादेखि एक वर्षसम्म काम गर्नुभएका हुन् ।
आर्थिक मामिला तथा योजना मन्त्रालयको पाँचौरु सचिवको रुपमा डण्डुराज घिमिरेले काम गर्दै आउनुभएको छ । यसअघि आर्थिक मामिला मन्त्रालयमा डा. मुकुन्दप्रसाद पौडेलले ११ महिना सचिवको जिम्मेवारी सम्हाल्नुभएको थियो । उहाँ नै बागमती प्रदेशको प्रमुख सचिवको रुपमा आउनुहुने भएको छ । यसअघि मन्त्रालयमा बसन्त अधिकारी, केवलप्रसाद भण्डारी, बालकृष्ण घिमिरेलगायतले सचिवको रुपमा काम गरेका थिए । उनीहरु ४ महिनादेखि ९ महिनासम्म बागमती प्रदेशमा कार्यरत थिए ।
प्रदेशको भूमि व्यवस्था, कृषि तथा सहकारी मन्त्रालयको पाँचौं सचिवकै रुपमा डा. मतिना वैद्य जोशी कार्यरत हुनुहुन्छ । यसअघि मन्त्रालयमा डा. बंशी शर्मा न्यौपाने, डा.विजयचन्द्र झा, निर्मल गदाल, डा. योगेन्द्रकुमार कार्कीले २ महिनादेखि ९ महिनासम्म कार्य गरेका छन् ।
उद्योग, पर्यटन वन तथा वातावरण मन्त्रालयमा भने जम्मा १ जना सचिव परिवर्तन भएका छन् । मन्त्रालयको पहिलो सचिवको रुपमा शिव वाग्लेले जिम्मेवारी सम्हाल्नुभएको थियो भने हाल सचिवमा सिन्धुप्रसाद ढुंगाना कार्यरत हुनुहुन्छ ।
प्रदेशमा संघीय सरकारले सरुवा गरेर आउने सहसचिव तथ सचिवहरुले थोरै समय काम गर्दा प्रदेशको विकास दु्रत गतिमा बढ्न सकेको देखिँदैन । २ महिनामै हुने सचिवका सरुवाले गर्दा प्रदेशको बजेट खर्च पनि बढ्न सकेको छैन । बागमती प्रदेशले कुल बजेटको ६० प्रतिशतमाथि हालसम्म खर्च गर्न सकेको छैन । थोरै समयको लागि आएका सचिवहरुले प्रदेशको विकासमा कुनै पनि भूमिका खेल्न भने सकेका छैनन् । बागमती प्रदेश सरकारले प्रमुख सचिव र सचिवहरुलाई कम्तिमा पनि २ वर्ष प्रदेशमा टिकाउन सक्नुपर्ने आवश्यकता देखिएको छ ।
