हेटौंडाः हेटौंडा उपमहानगर क्षेत्रमा सञ्चालित सरकारी प्रारम्भिक बालविकास (इसीडी) कक्षाका शिक्षकलाई न्यूनतम पारिश्रमिक दिने निर्णय हेटौंडा उपमहानगरपालिकाको कार्यपालिका बैठकले गरेको छ ।आइतबार बसेको हेटौंडा उपमहानगरपालिकाको कार्यपालिका बैठकले इसीडी कक्षाका शिक्षकलाई न्यूनतम् पारिश्रमिक प्रदान गर्ने निर्णय गरेको हेटौंडा उपमहानगरपालिकाकी उपमेयर मीना कुमारी लामाले जानकारी दिनुभयो ।
हेटौंडा उपमहानगरपालिकाको कार्यपालिकाले गरेको निर्णय आगामी वर्षको बजेट तर्जुमा गर्न असार १० भित्र बस्ने नगर सभाले पारित गरेपछि कार्यान्वयनको चरणमा जानेछ ।
संघीय सरकारबाट ६ हजार र प्रदेश सरकारबाट १ हजार गरी कुल ७ हजार रुपैयाँ मासिक तलब पाइरहेका इसीडी शिक्षकले न्यूनतम पारिश्रमिक लागू भए मासिक १३ हजार ५ सय रुपैयाँ प्राप्त गर्ने हेटौंडा उपमहानगरपालिकाको शिक्षा महाशाखा प्रमुख गंगाधर रिमालले जानकारी दिनुभएको छ । न्यूनतम पारिश्रमिक लागु गर्दा हेटौंडा उपमहानगरपालिकालाई वार्षिक करिब एक करोड रुपैयाँ भार थपिनेछ ।
