हेटौंडाः हेटौंडा उपमहानगरपालिकाले दरबन्दी मिलानको प्रक्रियामा दरबन्दी बढी भएका विद्यालयबाट दरबन्दी खाली भएका विद्यालयमा जानका लागि आवेदन दिन शिक्षकलाई आव्हान गरेको छ । मंगलबार सूचना प्रकाशित गरेर उपमहानगरपालिकाले दरबन्दी बढी भएका विद्यालय र दरबन्दी थप हुने विद्यालयको सूचि पनि सार्वजनिक गरेको छ ।
दरबन्दी मिलानको क्रममा हेटौंडा उपमहानगरक्षेत्रका २९ वटा विद्यालयमा ४२ वटा शिक्षक दबरन्दी कट्टा भएर २९ वटै विद्यालयमा दरबन्दी थप हुने भएको छ । दरबन्दी मिलानका लागि शिक्षकलाई निवेदन दिन उपमहानगरले १० दिनको म्याद दिएको छ । अहिले दरबन्दी मिलान हुन लागेका सबै प्राथमिक तहका शिक्षकहरु हुन् । गत माघ १० गते नगर शिक्षा समितिले दरबन्दी मिलान गर्ने निर्णय गरेको थियो ।
दरबन्दी मिलानका लागि आव्हान गरेअनुसार निवेदन दिएपछि शिक्षा विकास महाशाखाले सरुवाको प्रक्रिया पूरा गर्ने बताइएको छ । यदि १० दिनभित्र आवेदन प्राप्त नभए नियमानुसार शिक्षा विकास महाशाखाले नै दरबन्दी मिलान गरिदिने शिक्षा विकास महाशाखा प्रमुख गंगाधर रिमालले जानकारी दिनुभयो ।
दरबन्दी मिलानको क्रममा सबैभन्दा बढी सिद्धार्थ मावि र महेन्द्र माविमा ३/३ वटा दरबन्दी कटौति हुनेछ भने सबैभन्दा बढी विश्वज्योति आधारभूत विद्यालय, गोरक्षनाथ मावि, सुप्रभात आधारभुत विद्यालय र भृकुटी माविमा ३/३ वटा दबरन्दी थप हुनेछ ।
