हेटौंडाः मानवसेवा आश्रमले १३ जना भारतीय नागरिकलाई उनीहरुको परिवारमा पुनर्मिलन गराउने भएको छ । आश्रमको केन्द्रीय कार्यालय हेटौंडामा आश्रित १३ भारतीय नागरिकको परिवार सम्पर्कमा आइसकेको आश्रमका अभियन्ता होमनाथ पौडेलले बताउनुभयो ।
गएको ५ वर्षयता उद्धार गरिएको १३ जना भारतीय नागरिकहरुलाई आश्रमले उनीहरुको घरमै लगेर पारिवारिक पुनर्मिलन गराइदिने भएको हो । यही फागनु २६ गते उनीहरुलाई भारत लैजाने तयारी छ । भारतका जोधन निषाद, मुन्ना आलम, रोटा होजा, मोजाहिर मोहम्मद, हीराकान्त झा, अनिलकुमार मारदल, रोयकुमार यादव, गौतमकुमार शमा, बेल शर्मा, जितेन गुप्ता, अकबर हुसेन, विजय कुमार र महेशकुमार यादवको पारिवारिक पुनर्मिलन गराइने आश्रमले बताएको छ ।
यसअघि मानवसेवा आश्रमले भारतका एकसय जना र बङ्गलादेशका ५ जनालाई नेपालबाट उद्धार गरेर पारिवारिक पुनर्मिलन गराइसकेको छ । आश्रमको अभियन्ता पौडेलका अनुसार अहिले देशभरका २१ शाखामा १ हजार ६ सय ६० जना आश्रितहरु छन् । जसमध्ये अधिकांश भारतीय छन् भने चीनका १ जना रहेका छन् । आश्रमले १ हजार ३ सय ५० जनाको पारिवारिक पुनर्मिलन गराइसकेको छ ।
गौतम बुद्धको जन्मस्थल हेर्न आएका व्यक्ति आश्रममा
मानवसेवा आश्रमले पारिवारिक पुनर्मिलन गराउन लागेको भारतीय नागरिकमध्ये एक हुन्, महेशकुमार यादव । उनी नेपालमा गौतम बुद्धको जन्मस्थल लुम्बिनी हेर्न वि.स. २०७२ सालमा आए । विराटनगरबाट नेपाल प्रवेश गरेका उनी लुम्बिनी, सिन्धुली, ओखलढुंगा १३ भारतीय नागरिकलाई परिवारमा पुनर्मिलन गराउँदै मानवसेवा आश्रमहुदै बाग्लुङमा पुगेका थिए, जुनबेला मानवसेवा आश्रमको टिमले उनको उद्धार गर्यो ।
२७ वर्षका यादव स्नातक दोस्रो वर्षमा भारको बिहारमा अध्ययनरत थिए । मानसिक सन्तुलन ठिक नभएपछि उनी नेपालमा काम गरेर फर्कने सोच र गौतम बुद्धको जन्मस्थान हेर्न नेपाल आएको अहिले बताउछन् । नेपालमा भनेजस्तो नभएपछि सिन्धुलीमा १ महिना नेपालीको घरमा खेतबारीमा काम गरे । भारत घर फर्किएपछि संघीय लोकसेवाको डिस्ट्रिक म्याजेस्टरीको तयारी गर्ने योजनामा यादव छन् । नेपाल बस्न पनि सन्तुष्ट र घर जान पनि आफु सन्तुष्ट रहेको उनको भनाई छ ।
गौतम बुद्धको जन्मस्थल हेर्न आएका यादवले नेपालीहरु दयालु रहेका भन्दै गौतम बुद्धको जन्मस्थल नेपाल भएको र ज्ञान लिएको क्षेत्र भारतमा रहेको बताए । मानसिक सन्तुलन ठिक नभएका उनी भारतमा हुँदादेखि नै मानसिक रोगको औषधि सेवन गर्दै आएका छन् । परिवारमा आमा, दाइ, भाउजु र ३ जना बहिनीहरु रहेको भन्दै परिवारसँग भेट्न धेरै चाहेको उनले बताए । मानवसेवा आश्रमले परिवारको खोजी गरेकोमा उनले आश्रमलाई धन्यवादसमेत दिएका छन् ।
मानवसेवामा आश्रमको टोलीले यादवलाई बाग्लुङमा बर्षातको समयमा पानीमा भिजिरहेको नाजुक अवस्थामा उद्धार गरेको बताउँछन्, अभियन्ता पौडेल । मावनसेवा आश्रममा आएर बसेदेखि निकै अनुशासन र गणित विषयमा धेरै अब्बल रहेको पौडेलको भनाई छ । पौडेलका अनुसार यादव सँगै अन्य १२ जनालाई छिट्टै परिवारसँग पुनर्मिलन गराइनेछ ।
