हेटौंडाः मकवानपुरको १० वटै स्थानीय तहमा खोप केन्द्र निर्माण गरी कोरोनाविरुद्धको खोप अभियान सञ्चालन गरिने भएको छ । गत माघ १४ गतेदेखि हेटौंडा अस्पताबाट मकवानपुरमा कोरोनाविरुद्धको खोप अभियान सुरु भएको थियो ।
मकवानपुर जिल्लाको लागि एकमात्र हेटौंडा अस्पताललाई खोप केन्द्र निर्धारण गरिएको थियो । अब भने जिल्लाको १० वटै स्थानीय तहले आवश्यकताअनुसार खोप केन्द्र निर्माण गरेर कोरोनाविरुद्धको खोप लगाउन सक्ने जिल्ला स्वास्थ्य कार्यालय मकवानपुरले जनाएको छ ।
फागनु २३ गतेबाट ६५ वर्ष माथिका नागरिकलाई १० दिन र ५५ वर्ष माथिका नागरिकहरुलाई १० दिन गरी २० दिन खोप अभियान चल्ने स्वास्थ्य कार्यालय मकवानपुरका प्रमुख प्रणय उपाध्यायले बताउनुभयो । मकवानपुर जिल्लामा ५७ हजार आम नागरिकहरुलाई खोप दिइने भएको हो ।
हेटौंडा उपमहानगरपालिको ६ स्थानबाट कोरोनाविरुद्धको खोप लगाउने तयारी भएकोे छ । हेटौंडा उपमहानगरपालिकाको आयुर्वेद तथा जनस्वास्थ्य शाखाका प्रमुख भोला चौलागाईंका अनुसार हेटौंडाको हटिया, पदमपोखरी, लामसुरे, कमाने, बसामाडी तथा हेटौंडा अस्पतालबाट खोप अभियान सञ्चालन हुनेछन् । खोप अभियान सञ्चालन गर्न एमबीबीएस डाक्टर भएको स्थान छनौट गर्नुपर्ने भएका कारण धेरै स्थानमा अभियान सञ्चालन गर्न नसकिएको प्रमुख चौलागाईंले जानकारी दिनुभयो ।
यस्तै मकवानपुरगढीमा मक्रान्चुलीस्थित कोभिड अस्पतालबाट खोप अभियान सञ्चालन गरिने भएको छ । मकवानपुरगढीमा पालिकास्तरीय खोप अभियानको अभिमुखीकरणसमेत भइरहेको छ । स्वयम्सेवक, स्वास्थ्य चौकीमा कार्यरतहरुलाई अभिमुखीकरण गरिएको हो ।
मकवानपुरको विकट राक्सिराङ गाउँपालिकामा वडा नम्बर ८ देवीटारमा खोप केन्द्र निर्माण गरेर कोरोनाविरुद्धको खोप अभियान सञ्चालन गरिने गाउँपालिकाका स्वास्थ्य संयोजक विजय कापरीले जानकारी दिनुभयो । सोहीअनुरुप अन्य पालिकाहरुले पनि तयारी गरेका छन् ।
कैलाश गाउँपालिकाले ६५ वर्ष नाघेका आम नागरिकहरुलाई आफ्नो स्थानीय तहको ६ वटा स्वास्थ्य चौकीबाटै कोरोनाविरुद्धको खोप लगाउने तयारी भएको गाउँपालिकाका प्रमुख प्रशासकीय अधिकृत रामप्रसाद शर्माको बताउनुभयो । चैत्र ५ गतेसम्म ६५ वर्षमाथिका आम नागरिकहरुलाई खोप लगाइने उहाँले जानकारी दिनुभयो ।
