हेटौंडाः हेटौंडाबाट काठमाडौं जाने छोटो मार्गअन्तर्गत् भैंसेदेखि भीमफेदीसम्मको बाटो फराकिलो पारिने भएको छ । भैंसेदेखि भीमफेदीसम्म १४ किलोमिटर सडक १० मिटर चौडा हुनेगरी सडक फराकिलो पार्न लागिएको हो ।
यातायात पूर्वाधार निर्देशनालय बागमती प्रदेशका निर्देशक सहदेव भण्डारीका अनुसार आशीष जेभीसँग ३८ करोडमा सडक विस्तारका लागि ठेक्का सम्झौता भएको छ । सडक फराकिलो पार्ने क्रममा अहिले छलफल भइरहेको उहाँले जानकारी दिनुभयो । प्रदेशको भौतिक पूर्वाधार विकास मन्त्रालयले १० मिटर सडक चौडा गर्ने क्रममा घरहरु परेमा त्यसको क्षतिपूर्ति दिने तथा जग्गामात्र परेमा के गर्ने भन्नेबारे छलफल भइरहेको जनाएको छ ।
यसअघि भौतिक पूर्वाधार विकास मन्त्रालयले भीमफेदीदेखि कुलेखानी हेभीसम्मको सडक फराकिलो पार्ने काम गरिरहेको छ । भीमफेदीदेखि चकमकेसम्म ८ किलोमिटर सडक १० मिटर फराकिलो पार्ने काम लगभग अन्तिम चरणमा पुगेको छ । त्यसमध्ये ६ मिटर सडक कालोपत्रे गरिनेछ । यस्तै चकमकेदेखि हेभीसम्म ७.५ किलोमिटिर सडक १० मिटर चौडाई गर्ने कार्य चलिरहेको छ ।
सडक फराकिलो पार्ने काम यही फागुन अन्तिमसम्म सकिने निर्देशक भण्डारीले जानकारी दिनुभयो । उहाँले आगामी चैत्र महिनाको १० गतेबाट हेटौंडा–काठमाडौं जाने भीमफेदी–सिस्नेरीको बाटो साना सवारीहरुका लागि खुला गरिने बताउनुभयो ।
