हेटौंडाः प्रधानमन्त्री केपी शर्मा ओलीले ७० औं जन्मदिनको अवसरमा मंगलबार मानवसेवा आश्रमको देशभर रहेका आश्रममा आश्रितलाई खाना खुवाउनुभएको छ । पछिल्लो समय मानवसेवा आश्रमलाई प्रत्यक्ष सहयोग गर्दै आउनुभएका प्रधानमन्त्री ओलीले देशका १५ जिल्लामा आश्रम स्थापना गरेर सेवा गर्दै आएको मानवसेवा आश्रममा आश्रितलाई खाना खुवाउनुभएको मानवसेवा आश्रमले जनाएको छ ।
मानवसेवा आश्रमको १५ जिल्लामा २२ वटा सेवा केन्द्र छन् । ती सेवा केन्द्रमा एक हजार छ सय आश्रित रहेको मानवसेवा आश्रमले जनाएको छ । मकवानपुर जिल्लाको हेटौंडाबाट सुरु भएको मानवसेवाको अभियान देशव्यापी बनेको छ भने जिल्ला–जिल्ला हुँदै देशलाई नै सहयोगापेक्षी सडकमानवमुक्त मुलुक बनाउने अभियानमा मानवसेवा आश्रम अग्रसर भइरहेको छ ।
मकवानपुरको हेटौंडा उपमहानगरपालिका–९, लामसुरेधापमा मानवसेवा आश्रमले मुख्यआश्रम निर्माण गरेको छ । व्यक्तिव्यक्तिको मुठ्ठीदानबाट सुरु गरिएको अभियानमा विभिन्न संघ, संस्था हुँदै अहिले नेपाल सरकारको पनि साथ, सहयोग रहँदै आएको छ ।
