हेटौंडाः सरकारले ७१ औं प्रजातन्त्र दिवसको अवसर पारेर पाँच सय ८० कैदीको बाँकी कैद सजाय मिनाहा र १५ जनालाई आममाफी दिने निर्णय गरेको छ । मंगलबार बसेको मन्त्रिपरिषद् बैठकले मुलुकी अपराध संहिता २०७४ लागू हुनु अघिको प्रावधानअनुसार १ सय ७९ जना र २०७५ भदौ १ गतेबाट लागू भएको अपराध संहिता अनुसार ४ सय १ कैदीको बाँकी सजाय मिनाहा गर्ने निर्णय गरेको हो ।
तीनवटै प्रावधानअनुसार कैद कट्टा र माफी मिनाहा हुनेको संख्या ५ सय ९५ छ । बाँकी सजाय मिनाहा पाएकामध्येका १ सय ७९ जना कैदी व्यक्ति हत्यालगायत कसुरमा जन्मकैद सजाय पाएर कारागारमा सजाय भुक्तानरत कैदी हुन् । यसैगरी मन्त्रिपरिषद् बैठकले अपराधमा दोषी ठहर भई कानुनी कारबाहीको दायरामा नआई फरार रहेका र केही कैदमै भएका १५ जनालाई आममाफी दिने पनि निर्णय गरेको छ । आममाफीका लागि गृह मन्त्रालयबाट ४० जनाको सिफारिस गएकोमा २५ जनाको सूची फिर्ता गरिएको स्रोतको भनाइ छ । आममाफीको सिफारिसमा परेका व्यक्तिबारे राष्ट्रपतिबाट निर्णय नभई बोल्न नमिल्ने गृह मन्त्रालयका अधिकारीले जानकारी दिए । राष्ट्रपति विद्यादेवी भण्डारीबाट मन्त्रिपरिषद्को निर्णय अनुसार कैद मिनाहा र आममाफी भए सिफारिस भएका कैदी कारागार मुक्त हुनेछन् ।
मुलुकी अपराध संहिता २०७४ बमोजिम अपराधको नकारात्मक सूचीमा नपरेका, ५० प्रतिशत सजाय भुक्तान गरेका, असल चालचलन भएका र जेलरबाट प्रमुख जिल्ला अधिकारी हुँदै सिफारिस भई आएका ४ सय १ जना र २०७४ अघिको कानुनअनुसार १ सय ७९ जनालाई बाँकी सजाय कट्टा गरिएको मन्त्रिपरिषद् कार्यालय स्रोतले जानकारी दियो ।
यसैबीच मकवानपुरको भीमफेदी गाउँपालिकास्थित भीमफेदी कारागारमा कैद भुक्तान गरिरहेका ५० जना कैदीहरुको कैद मिनाहाका लागि सिफारिस गरिएको छ । प्रजातन्त्र दिवसको अवसरमा राष्ट्रपतिद्वारा देशभरका विभिन्न कारागारमा कैदी जीवन बिताइरहेका असल आचरण भएका कैदीको कैद मिनाहाको घोषणा हुनेछ । भीमफेदी कारागारका प्रमुख मतृकाप्रसाद ढकालका अनुसार असल आचरण भएका तथा विभिन्न मापदण्ड पूरा गरेका कैदीहरुलाई ४० प्रतिशत, ५० प्रतिशत र ६० प्रतिशत गरी सरकारले कैद मिनाहा गर्ने गरेको छ । प्रजातन्त्र दिवस, गणतन्त्र दिवस तथा संविधान दिवसमा कैद मिनाहा गर्ने गरिएको छ ।
भीमफेदी कारागारमा फागुन १ गते शनिबार ६ सय ७९ जना कैदीहरु रहेका छन् भने बन्दी (थुनुवा) दुई सय ८८ जना रहेका छन् । यस्तै विदेशी ७६ जनासहित नौं सय सात जना कैदीबन्दी कारागारमा रहेका छन् । कारागारमा सबैभन्दा धेरै लागूऔषधको मुद्दामा तीन सय ८८ जना रहेका छन् भने जबरजस्ती करणीको मुद्दामा दुई सय १७ जना रहेका छन् । यस्तै कर्तव्यज्यान मुद्दामा एक सय ६३ जना रहेको कारागार प्रमुख मातृका प्रसाद ढाकालले बताउनु भयो ।
