हेटौंडाः मानवसेवा आश्रममा आश्रय लिएर बसेका आश्रितहरुले सशस्त्र प्रहरी बल (एपीएफ) अस्पतालमा उपलब्ध सबै किसिमका स्वास्थ्य सेवा निःशुल्क पाउने भएका छन् । सशस्त्र प्रहरी प्रधान कार्यालय र आश्रमबीच यससम्बन्धी सम्झौता भएको हो ।
एपीएफ अस्पतालबाट उपलब्ध हुने इमर्जेन्सी, बहिरंग, जनरल तथा विशेषज्ञ ओपीडी, अन्तरंगअन्तर्गत्का सबै, आईसीयू, एचसीयू, एचडीयू, उपलब्ध सबै किसिममा शल्यक्रिया, प्याथोलोजी, रेडियोलोजीलगायत स्वास्थ्य सेवा निःशुल्क उपलब्ध गराउने सम्झौता भएको छ । यसैगरी आईसीयू तथा डायलसिस सेवा, मुटु, मिर्गौला, मधुमेहलगायत रोगसँग सम्बन्धित औषधि निःशुल्क प्रदान गर्ने, अक्सिजन ग्यास सिलिन्डर उपलब्ध गराए निःशुल्क रिफिलिङ, निःशुल्क एम्बुलेन्स र शववाहन सेवा पनि उपलब्ध गराइने सम्झौतामा उल्लेख छ ।
एपीएफ अस्पताल सशस्त्र प्रहरी कल्याणकारी सेवा केन्द्रबाट सञ्चालित स्वास्थ्य संस्था हो । अस्पतालको १ सय १० शैय्यामध्ये मानवसेवा आश्रमका लागि ३ वटा छुट्याइएको छ । आश्रम सञ्चालनका लागि खटिएका स्वयम्सेवक र कर्मचारीले पनि निःशुल्क सेवा पाउनेछन् । सशस्त्र प्रहरी महानिरीक्षक शैलेन्द्र खनाल र आश्रमका संरक्षक गोविन्द टन्डनको उपस्थितिमा अस्पतालका तर्फबाट एसएसपी डा. रूपक महर्जन र आश्रमका अध्यक्ष रामजी अधिकारीले सम्झौतापत्रमा हस्ताक्षर गर्नुभएको छ ।
