हेटौंडाः मकवानपुरको बागमती गाउँपालिका–९, बेतिनीमा निर्माणसम्पन्न स्वास्थ्य चौकी भवन पालिकालाई हस्तान्तरण गरिएको छ । राष्ट्रिय पुनर्निर्माण प्राधिकरणअन्तर्गत जिल्ला आयोजना कार्यान्वयन इकाई (भवन) मकवानपुरका प्रमुख तुलसीराम खरबुजाले आइतबार बागमती गाउँपालिकाका अध्यक्ष सर्केश घलानलाई स्वास्थ्य चौकी भवन हस्तान्तरण गर्नुभएको हो ।
गाउँपालिका अध्यक्ष सर्केश घलानले वडा अध्यक्ष मदन कुमार दोराङ्च्याङलाई र वडा अध्यक्ष दोराङ्च्याङले स्वास्थ्यचौकी इन्चार्ज राप्रसाद सिञ्जाली मगरलाई भवन हस्तान्तरण गरिएको छ । एक करोड ६० लाख रुपैयाँ लागत अनुमान गरिएको भवन पुष्पाञ्जली जिम्बा जेभीले ठेक्का प्रक्रियाबाट एक करोड ३० लाख रुपैयाँमा निर्माण गरेर हस्तान्तरण गरेको हो । निर्माण कम्पनिले २ तलाको भवन सम्झौता अवधिमै निर्माण सकेको जिल्ला आयोजना कार्यान्वयन इकाई (भवन) का इन्जिनियर रविन पाठकले जानकारी दिनुभएको छ ।
जिल्ला आयोजना कार्यान्वयन इकाई (भवन) मकवानपुर मार्फत मकवानपुर जिल्लामा पहिलो चरणमा निर्माण सुरु गरिएको ५ वटा स्वास्थ्य चौकी भवन मध्ये बेतिनीको भवन निर्माणसम्पन्न भई हस्तान्तरण भएको पहिलो भवन हो । पहिलो चरणमा मकवानपुरको हेटौंडा उपमहानगरपालिकाको बसामाडी, कैलाश गाउँपालिकाको गोगने र डाँडाबास तथा राक्सिराङ गाउँपालिकाको चैनपुरमा स्वास्थ्य चौकी भवन निर्माणाधिन अवस्थामा छ । निर्माणाधिन चार वटै स्वास्थ्य चौकी भवन आगामी जेठ महिनासम्ममा निर्माण पूरा हुने इन्जिनियर पाठकले बताउनुभएको छ ।
