हेटौंडाः औपचरिक क्षेत्र सेवा केन्द्र (इन्सेक) को आयोजनामा शुक्रबार नेपाल मानवअधिकार वर्ष पुस्तक २०२१ प्रकाशन गर्ने सन्र्दभमा वार्षिक पूर्वसमीक्षा कार्यक्रम सम्पन्न भएको छ । जिल्ला समन्वय समितिका उपप्रमुख भगवती पुडासैनीको प्रमुख अतिथ्यमा भएको कार्यक्रममा मकवानपुर जिल्लामा २०२० भित्र भएका मानव अधिकार उल्लङ्घनका घटनाहरुको बारेमा जानकारी दिइएको थियो ।
कार्यक्रममा जिल्ला समवन्य समितिका उपप्रमुख पुडासैनीले मानव अधिकारको क्षेत्रमा साना–ठूला घटनाहरु र हरेक घटनाको पछि लागेर मानव अधिकारको क्षेत्रमा उदाहरणीय कार्य गर्नु भएको भन्दै मकवानपुर जिल्ला इन्सेक पदाधिकारीहरुको प्रशंसा गर्दै खुशी व्यक्त गर्नुभयो ।
इन्सेकले कतै घटना हुनसाथ डाटामात्र संकलन नगरी प्रत्यक्ष रुपमा पनि सहयोग गरिरहेको र पत्रकारहरुले पनि गाउँगाउँमा भएका मानवअधिकार उल्लङ्घनका घटनाहरुलाई सबैसामु ल्याई कानुनी दायरामा ल्याउन मद्दत गरिरहेको भन्दै पुडासैनीले धन्यवाद दिनुभयो । मानवअधिकार उल्लङ्घनका घटनाहरु अदालतसम्म पुगे पनि न्याय सम्पादनमा ढिलासुस्ती हुनाले पीडित पक्ष झनै समस्यामा परेको बताउँदै न्यायसम्पादनलाई छिटोछरितो बनाउन न्यायका लागि वकालत गर्नेहरुको ध्यान जानु जरुरी रहेको पुडासैनीले बताउनुभयो ।
मकवानपुर जिल्लामा सन् २०२० को जनवरीदेखि डिसेम्बरसम्म मानव अधिकारको उल्लङ्घन तथा ज्यादतीका घटनामा अन्य पक्षबाट ५० जना महिला, १२ जना पुरुष र १ जना लैङ्गिक तथा अल्पसंख्यक गरी ६३ जना पीडित भएको जानकारी दिइयो । त्यसैगरी बाल अधिकारको घटनामा १९ जना बालिका पीडित भएकोमा १२ जना बलात्कार र ६ जना यौन दुव्र्यवाहरबाट पीडित भएको र एक नवजात शिशुको हत्या भएको बताएको थियो ।
मकवानपुर जिल्लामा महिला अधिकारको घटनामा २२ जना बलात्कार, ५ जना बलात्कारको प्रयास, एकजना बेचविखन तथा ओसारपसारको प्रयास, २ जनाको परिवारजनबाटै हत्या गरी २८ जना पीडित भएको इन्सेको अभिलेखमा रहेको बताएको थियो ।
अघिल्लो वर्ष (सन् २०१९ मा) मकवानपुर जिल्लामा मानव अधिकार उल्लङ्घन तथा ज्यादतीका घटनामा अन्य पक्षबाट ४६ जना महिला र ५ जना पुरुषसहित ५१ जना र राज्यपक्षबाट २ पुरुष गरी ५३ जना पीडित बनेका थिए । यस्तै, बालअधिकार उल्लङ्घनका घटनामा २३ जना र महिला अधिकार उल्लङ्घन घटनामा १९ जना पीडित बनेका थिए ।
कार्यक्रममा इन्सेक मकवानपुरका जिल्ला प्रतिनिधि एवम् पत्रकार प्रताप विष्ट, आरती पाठक, अधिवक्ता धुव्रप्रसाद चौलागाईंलगायत विभिन्न संघसंस्थाका प्रतिनिधि तथा पत्रकारहरुको उपस्थिति थियो ।
