हेटौंडाः विश्वव्यापी महामारी कोभिड १९ का कारण विदेशमा निधन भएका मकवानपुरका २ नेपालीको परिवारलाई आइएमईले आर्थिक सहयोग गरेको छ । साउदी अरबमा निधन भएका हेटौंडा–४ का सोहन कुमार गुरुङ र बकैया गाउँपालिकाको छतिवनका तुल बहादुर कामीका परिवारलाई राहत स्वरुप प्रतिपरिवार ५० हजार रुपैयाँका दरले नगद सहयोग प्रदान गरिएको हो । हेटौंडा–४ का गुरुङकी श्रीमती विष्णुमाया गुरुङ र छतिवनका कामीका छोरा युवराज विश्वकर्मालाई आइएमईका क्षेत्रीय प्रमुख सुरज पौडेलले नगद सहयोग हस्तान्तरण गर्नुभएको छ ।
विदेशमा निधन भएका नेपालीका परिवारलाई सहयोगका लागि आइएमईले आईएमई भरोसा कोष स्थापना गरेको थियो । सोही कोष अन्तर्गत मकवानपुरका दुई परिवारलाई राहत रकम वितरण गरिएको क्षेत्रीय प्रमुख पौडेलले जानकारी दिनुभएको छ । परिवार पाल्नकै लागि विदेश गएका व्यक्तिको उतै निधन हुँदा उक्त परिवारलाई राहत स्वरुप आर्थिक सहयोग गरिएको पौडेलले बताउनुभयो ।
