हेटौंडाः नेपाल कम्युनिष्ट पार्टी (नेकपा) मकवानपुरको हेटौंडा–४, पुष्पलाल पार्कसँगै रहेको पार्टी कार्यालयलाई नेकपाका मकवानपुरको प्रचण्ड–माधव समूह र ओली समूह दुबैले दावी गर्दै आएका छन् । सोमबार नेकपा मकवानपुरको ओली समूहका अध्यक्ष एकलाल श्रेष्ठ, जिल्ला सहईन्चार्ज रामेश्वर रानाको उपस्थितिमा नेकपाका कार्यकर्ताहरुले पार्टी कार्यालयमा ताला लगाएका छन् ।
गत शनिबार हेटौंडामा भएको नेकपा ओली समूहको भेलाले नेकपा मकवानपुरका अध्यक्ष मुनु सिग्देल र सचिव प्रेमबहादुर पुलामीलाई कारबाही गरेको घोषणा गर्दै एकलाल श्रेष्ठलाई अध्यक्षमा चयन गरेको सार्वजनिक गरेको थियो । प्रचण्ड–माधव समूह र ओली समुहमध्ये कुन आधिकारिक नेकपा हो भन्ने विषयमा निर्वाचन आयोगले अझै टुंगो लगाउन सकेको छैन । दुबै समूहले आफ्नो समूह नै आधिकारिक नेकपा भएको दाबी गर्दै आएका छन् । यस्तै दुबै समूहले सूर्य चिन्ह आफ्नो भएको बताउँदै आएको छ ।
मकवानपुरमा नेकपाको प्रचण्ड–माधव समूहर र ओली समूह दुबैले जिल्ला कार्यकर्ता भेला गरिसकेको छ भने जिल्लाको वडा–वडामा दुबै समूहले वडा भेला गरिरहेका छन् । ओली समूहले ताजा जनादेशमा जान निर्वाचन हुनुपर्ने भन्दै यसको तयारी अगाडि बढाएको नेकपा अध्यक्ष एकलाल श्रेष्ठले बताउनुभयो । यता प्रचण्ड–माधव समूहले भने नेकपाको आफ्नो समूहमा पार्टी प्रवेशलाई तिव्रता दिएको छ । नेकपा पार्टी कार्यालय मकवानपुरको दुरुपयोग हुन थालेपछि तालाबन्दी गर्नुपरेको नेकपा ओली समूहका नेताहरुले बताएका छन् ।
