हेटौंडाः नेपाली कांग्रेस मकवानपुरले राष्ट्रिय एकता तथा मेलमिलाप दिवसको अवसरमा बिहिबार हेटौंडामा विचार गोष्ठीको आयोजना गरेको छ । नेपाली कांग्रेस मकवानपुरका कार्यवाहक सभापति विष्णुप्रसाद लामिछानेको सभाध्यक्षता तथा केन्द्रीय सदस्य महालक्ष्मी उपाध्याय डिनाको प्रमूख आतिथ्यमा विचार गोष्ठी भएको हो ।
गोष्ठीमा बोल्नुहुँदै केन्द्रीय सदस्य उपाध्यायले कांग्रेसका संस्थापक नेता वीपी, गणेशमान, शैलजा आचार्य, खुमबहादुर खड्कालगायत अन्य शीर्ष नेताहरु राष्ट्रिय मेलमिलापको नीति लिएर नेपाल फर्केको दिनलाई नेपाली कांग्रेसले सम्झिरहने र अहिले देशको अवस्थालाई मध्यनजर गर्दा वीपीको नीति अत्यन्तै आवश्यक रहेको बताउनुभयो ।
देशमा कम्युनिष्टले बहुमत प्राप्त गरी ५ वर्षसम्म सरकार चलाउन दिएपनि जनताको मतलाई कुठाराघात गर्दै आन्तरिक किचलोका कारण देशलाई नै बन्धक बनाउने काम गरेको बताउँदै नेतृ उपाध्यायले कम्युनिष्टले जनतालाई दुःख दिँदै देशलाई अप्ठ्यारो परिस्थितिमा पुर्याएको बताउनुभयो ।
विसं २०३३ साल पौष १६ गते विश्वेश्वरप्रसाद कोइरालाका साथ गणेशमान सिंह र अन्य शीर्ष नेताहरुसहित आठ वर्ष लामो निर्वासन अन्त्य गरी स्वदेश फर्कनु भएको दिनलाई नेपाली कांग्रेसले हरेक वर्ष राष्ट्रिय एकता तथा मेलमिलाप दिवसको रुपमा मनाउँदै आएको छ ।
२०१७ सालमा तत्कालीन राजा महेन्द्रले जननिर्वाचित प्रधानमन्त्री वीपी कोइरालाको सरकार बर्खास्त गर्दै निर्दलीय पञ्चायती व्यवस्था शुरु गरेपछि कोइरालासहितका नेतालाई ७ वर्ष जेल पठाइएको थियो भने २०२५ सालमा वीपीसहितका कांग्रेस नेता भारत प्रवासमा गएका थिए । तर मेलमिलापको नीति बोकेर नेपाल आएका वीपीसहितका कांग्रेस नेतालाई तत्कालीन पञ्चायत व्यवस्था र राजासमेतले पक्रेर सुन्दरीजल बन्दीगृहमा लगेर राखेका थिए ।
कार्यक्रममा कार्यवाहक सभापति लामिछाने, सचिव बुद्ध लामा, कोषाध्यक्ष गोपीलाल विश्वकर्मा, जिल्ला सदस्य अर्जुनप्रसाद दाहाल, नेपाल महिला संघ मकवानपुरकी अध्यक्ष लक्ष्मी श्रेष्ठलगायतले वीपी र गणेशमानको योगदान र राष्ट्रिय एकता तथा मेलमिलापको बारेमा प्रष्ट पार्नुभएको थियो ।
विचार गोष्ठीमा कांग्रेस मकवानपुरका पदाधिकारी, महासमिति सदस्यहरु, सल्लाहकारहरु, जिल्ला सदस्यहरु, क्षेत्रीय सभापतिहरु, वडासभापतिहरु, भातृ एवम् शुभेच्छुक संघसंगठनका पदाधिकारी एव सदस्यहरु, क्रियाशील सदस्यहरु र साधारण सदस्यहरुको उपस्थिति रहेको थियो ।
