हेटौंडाः बागमती प्रदेश सरकारले पाउडर दुध उत्पादन गर्ने भएको छ । सरकारले प्रदेश दुग्ध विकास बोर्डमार्फत धुलो दुध उत्पादन गर्न लागेको हो । सरकारले अधिक उत्पादन भएको बखतको दूध संकलन गरेर धुलो बनाउने र कम उत्पादन भएको बखत वितरण गर्ने उद्देश्यले दुग्ध पाउडर प्लान्टको शिलान्यास गरेको छ ।
हेटौंडा–१०, न्यूरेनीमा पाउडर दुध प्लान्टको प्रदेशका मुख्यमन्त्री डोरमणि पौडेलले बिहीबार शिलान्यास गर्नुभएको हो । शिलान्यासका क्रममा मुख्यमन्त्री पौडेलले उत्पादन गर्ने र उत्पादित वस्तुको बजारीकरण नगर्ने परिपाटीको अन्त्य गर्न पाउडर प्लान्ट स्थापना गर्न लागिएको बताउनुभयो । पौडेलले सडकमा दुध पोख्नुपर्ने अवस्था अन्त्य हुने बताउनुभयो । प्रदेश सरकार किसानका पक्षमा हरेक काम गर्न तयार रहेकोे बताउनुभयो । कार्यक्रममा प्रदेशका भूमि व्यवस्था, कृषि तथा सहकारी मन्त्री दावा दोर्जे लामाले कृषि क्षेत्रको विकासका लागि सरकार प्रतिवद्ध रहेको बताउनुभयो ।
बागमती प्रदेश सरकारको पशुपन्छी तथा मत्स्य विकास निर्देशनालयले धुलो दुध उद्योग स्थापनाका लागि विस्तृत परियोजना प्रतिवेदन (डिपीआर) तयार गरेको थियो । ४५ करोड रुपैयाँ लागत अनुमान गरेर निर्देशनालयले ठेक्काको प्रक्रिया सुरु गरेको थियो । चालु आर्थिक वर्षका लागि ३ करोड रुपैयाँ बजेट विनियोजन गरेको छ । दैनिक ५ टन पाउडर दुध उत्पादन क्षमताको उद्योग स्थापना गर्न लागिएको प्रदेश दुग्ध विकास बोर्डका अधिकृत सत्रुघन साहले जानकारी दिनुभयो । पाउडर दुध उद्योगका लागि २ बिगाहा जमिन छुट्याइएको छ ।
