हेटौंडाः विद्यालयमा अध्ययन गर्ने छात्रालाई रजश्वला भएको समयमा पनि अध्ययनमा निरन्तरता दिनका लागि एक गैरसरकारी संस्थाको सहयोगमा स्वास्थ्य सुरक्षा सामग्री प्रदान गरिएको छ । मनहरी गाउँपालिका–४, मसिनेस्थित पशुपतिनाथ माविका एक सय १० छात्रालाई विकासका लागि सहयोग र सहकार्य नेपालले महिनावारी स्वास्थ्य सामग्री उपलब्ध गराएको हो ।
विद्यालय व्यवस्थापन समितिका अध्यक्ष माधव गौतमको सभाध्यक्षतामा भएको कार्यक्रममा मनहरी–४ का वडाध्यक्ष ध्रुब खड्काले छात्राहरुलाई स्वास्थ्य सामग्रीको झोला वितरण गर्नुभएको छ । एक पटकमात्र प्रयोग गरेर फाल्ने सेनिटरी प्याडले वातावरणमा नकारात्मक असर गर्ने र प्रयोग गर्न नजानेको अवस्थामा जनस्वास्थ्यमा पनि असर पुर्याउन सक्ने भएकोले सफा गरेर पुनःप्रयोग गर्न मिल्ने प्याड वितरण गरिएको विकासका लागि सहयोग र सहकार्य (हेल्पकोड) नेपालकी कार्यक्रम संयोजक शीला देवकोटाले जानकारी दिनुभयो ।
चितवनको ईच्छाकामना गाउँपालिका र मकवानपुरको मनहरी गाउँपालिकाका ५ सय जना छात्रालाई उपलब्ध गराइएको महिनावारी सुरक्षा सामग्रीमा साबुन, ब्रस, मन्जन, भित्रि कपडा, पुनःप्रयोग गर्न मिल्ने प्याड, नेलकटर, काइँयोलगायतका सामग्री छ । हेल्पकोडले पशुपतिनाथ माविमा रहेको बाल क्लबका लागि खेलसामग्रीसहित सूचना बोर्ड, स्टेशनरी पनि उपलब्ध गराएको छ ।
कोभिड–१९ महामारीको बीचमा पठनपाठन गर्न सहज बनाउनका लागि संस्थाले विद्यालयलाई मास्क, सेनिटाइजर, साबुनलगायत सामग्री पनि उपलब्ध गराइएको हेल्पकोड नेपालका कर्मचारी विकास चेपाङले जानकारी दिनुभएको छ । सेन्सरमा आधारित अटोमेटिक सेनिटाईज मेसिनसहित सेनिटाईजर उपलब्ध गराइएको हो । स्वास्थ्य सामग्री हस्तान्तरणका क्रममा मनहरी–४ का वडासचिव बिदुर पाठक, विद्यालयका प्रधानाध्यापक भानुभक्त आचार्य, शिक्षक ईश्वर रिजाललगायतले गैरसरकारी संस्थाले सामुदायिक विद्यालयका बालबालिकाका लागि महत्वपूर्ण काम गरेको जानकारी दिनुभयो । हेल्पकोड नेपालले मनहरी–४ को चेपाङ प्रावि र सृजना प्राविमा पनि सहयोग गरिरहेको छ ।
