हेटौंडाः कोशेली एण्ड हुलास क्लबको आयोजनामा सिमरामा शनिबारबाट सुरु भएको भेट्रान्स कप २०७७ को उद्घाटन खेलमा मकवानपुर भेट्रान्स क्लबले हाम्रो फुटबल क्लब वीरगञ्जलाई ४–१ को फराकिलो गोल अन्तरले पराजित गरेको छ । मकवानपुर भेट्रान्सको तर्फबाट वीरेन्द्र खत्रीले ३ गोल गर्दै ह्याट्रिक गरेका छन् भने अमित सिंहले १ गोल गरेका थिए । प्रतियोगितामा मकवानपुर भेट्रान्स क्लबको खेल १६ गते मंगलबार रहेको विजय युथ क्लबका प्रशिक्षक एवम् खेलाडी सुविन घिमिरेले बताउनु भयो ।
विभिन्न जिल्लाको १२ वटा टिम सहभागी रहेको प्रतियोगितामा हेटौंडाबाट मकवानपुर भेट्रान्स क्लब र हेटौंडा फुटसल भेट्रान्स गरी २ वटा टिम सहभागी छ । प्रतियोगितामा प्रथम हुने टिमले नगद ३० हजारसहित शिल्ड, मेडल र प्रमाणपत्र प्राप्त गर्नेछन् भने दोस्रो हुने टिमले नगद २० हजारसहित शिल्ड, मेडल र प्रमाणपत्र प्राप्त गर्ने आयोजकले बताएको छ ।
