हेटौंडाः मकवानपुरको बकैया गाउँपालिका–४ नयाँदमारमा गत शुक्रबार विकास वाईबाको हत्यामा संलग्न भीमराज भोलनलाई प्रहरीले आइतबार सार्वजनिक गरेको छ । घटना भएको २४ घण्टाकै अवधिमा प्रहरीले नियन्त्रणमा लिएको भीमराजलाई जिल्ला प्रहरी कार्यालय मकवानपुरले आइतबार बिहान कार्यालय परिसरमा पत्रकार सम्मेलन गरेर सार्वजनिक गरेको हो ।
भीमराजलाई ललितपुर जिल्लाको बागमती गाउँपालिका–२, माल्टाबाट पक्राउ गरेको मकवानपुर प्रहरी प्रमुख प्रहरी उपरीक्षक सुशील सिंह राठौरले जानकारी दिनुभएको छ । प्रहरी उपरीक्षक राठौरका अनुसार भीमराजलाई शंकास्पद अवस्थामा देखेपछि स्थानीयले नै प्रहरीलाई जानकारी गराएका थिए । स्थानीयको जानकारी र प्रहरीलाई प्राप्त हुलियाअनुसार भीमराज नै भएको निश्चित भएपछि मकवानपुरको बकैया गाउँपालिकाको ठिंगनस्थित इलाका प्रहरी कार्यालय ठिंगनबाटै प्रहरी परिचालन गरेर प्रहरी उपरीक्षक राठौर आफैं ललितपुरको माल्टा पुग्नुभएको थियो ।
विकास वाईबा र भीमराज भोम्जन मिल्ने साथी भए पनि के कारणले हत्या गर्यो भन्ने खुल्न बाँकी रहेको प्रहरीले जनाएको छ । खुकुरी प्रहार गरेर विभत्स ढंगले हत्या गरिएकोले भीमराजले नियोजित रुपमै हत्या गरेको प्रहरीको प्रारम्भिक अनुमान छ । प्रहरीले हत्या गर्न प्रयोग गरिएको खुकुरी समेत बरामद गरिसकेको छ ।
