हेटौंडाः हेटौंडा–११, नवलपुरमा रहेको क्षिर सागर दुग्ध उत्पादक सहकारी संस्था लिमिटेडलाई हेटौंडा उपमहानगरपालिकाले ३ लाख ११ हजार रुपैयाँ लागतको मिल्क एनालाइजर मेसिन सहयोग गरेको छ । सोमबार हेटौंडा उपमहानगरपालिकाका मेयर हरिबहादुर महतले सहकारीलाई मिल्क एनालाइजर मेसिन हस्तान्तरण गर्नुभएको छ ।
सहकारीका अध्यक्ष शालिकराम पुडासैनीको सभाध्यक्ष तथा हेटौंडा उपमहानगरपलिकाका मेयर हरि बहादुर महतको प्रमुख आतिथ्यमा मेसिन हस्तान्तरण कार्यक्रम भएको हो । कार्यक्रममा ११ नम्बरका वडा अध्यक्ष गोकर्णप्रसाद पराजुली, वडा सदस्य जुना दाहाल लगायतको उपस्थिति रहेको थियो । मिल्क एनालाइजर मेसिनले दुधको गुणस्तर मापन गरी दुग्ध उत्पादक कृषकलाई दुधको मूल्य निर्धारण गर्न सहयोग पुग्ने सहकारीका व्यवस्थापक देवकुमार श्रेष्ठले जानकारी दिनुभयो ।
क्षिर सागर दुग्ध सहकारीमा दैनिक ६ सय लिटर दुध सङ्कलन हुने व्यवस्थापक श्रेष्ठले बताउनुभयो । सहकारीले किसानबाट सङ्कलन गर्दा प्रतिलिटर दुधको मूल्य ५५ रुपैयाँदेखि ६५ रुपैयाँसम्म भुक्तानी गर्ने गरेको छ ।
