हेटौंडाः ५३ औं प्रमुख जिल्ला अधिकारीको रुपमा मकवानपुरमा गोविन्दप्रसाद रिजालले आजबाट पदभार ग्रहण गर्नुभएको छ । यसअघि प्रमुख जिल्ला अधिकारी रहनुभएका दिपकराज नेपाल बारा जिल्लामा सरुवा हुनुभएपछि मकवानपुरमा प्रमुख जिल्ला अधिकारी (सिडियो) को रुपमा रिजाल आउनुभएको हो ।
यसअघि मकवानपुर जिल्लामा प्रमुख जिल्ला अधिकारीहरु सरुवा भएर आउने गरेता पनि लामो समयसम्म रहेर काम गर्न पाउने गरेका छैनन् । यसअघिका प्रमुख जिल्ला अधिकारी नेपालले ७ महिना मकवानपुरमा सिडियो भएर काम गर्नुभयो भने गत आर्थिक वर्षमा १२ महिनामा ४ जना प्रमुख जिल्ला अधिकारीहरु मकवानपुरमा परिवर्तन भएका थिए । यस्तै जिल्ला प्रशासन कार्यालयको मकवानपुरको एक कर्मचारीमा कोरोना पुष्टि भएपछि सबै सेवा बन्द गरिएकोमा आइतबारबाट पुनः सबै सेवा सञ्चालनमा आएको छ ।
