हेटौंडाः जिल्ला अदालत बार एशोसिएसन हेटौंडाको अध्यक्षमा अधिवक्ता ऋषी केबी निर्विरोध निर्वाचित हुने पक्का भएको छ । भोलि शनिबार निर्वाचन हुने भनिए पनि प्रगतिशील कानुन व्यवसायीको तर्फबाट मात्रै उम्मेदवारी परेको थियो । प्रजातान्त्रिक कानुन व्यवसायीले आफ्नो उम्मेदावरी दर्ता नगराएपछि निर्विरोध रुपमा जिल्ला अदालत बार एशोसिएसन हेटौंडाको अध्यक्षतामा ऋषी केबी निर्वाचित हुने पक्का भएको हो । यद्यपि निर्विरोध निर्वाचित भएको घोषणा भने भइनसकेको निर्वाचन अधिकृत तिर्थराज भट्टराईले जानकारी दिनुभयो । आजै घोषणा गर्ने तयारी भइरहेको उहाँले बताउनुभयो ।
अधिवक्ता ऋषी केबीले जिल्ला अदालत बार एशोसिएसनको अध्यक्षमा, उपाध्यक्षमा राम प्रसाद रिमाल, सचिवमा जयराम सुवेदी, सह–सचिवमा शान्ति माया मुक्तान, कोषाध्यक्षमा रमीता चौलगाई, केन्द्रिय पार्षदमा अज्मीर केसीले उम्मेदवारी दिनुभएको थियो ।
यस्तै अन्य २ सदस्यहरु भने नयाँ बन्ने समितिले पछी चयन गर्ने जनाइएको छ । जिल्ला अदालत बार एशोसिएसनको निर्वाचनमा प्रजातान्त्रिक कानुन व्यवसायी संगठन हेटौंडाले उम्मेदवारी दर्ता नगराएको निर्वाचन अधिकृत तिर्थराज भट्टराईले बताउनुभयो । दुई मध्ये एक मात्र संगठनले उम्मेदवारी दर्ता गराएको कारण निर्वाचन नहुने भएको र निर्विरोध हुने भएको उहाँले बताउनुभयो ।
