हेटौंडाः यसपालिको वडा दसैंमा नेपाल बैंक हेटौंडा शाखाले नयाँ नोट वितरण नगर्ने भएको छ । गएको वर्षहरुमा दसैंमा पुरानो नोट लिएर नयाँ नोट साट्दै आएको नेपाल सरकारको स्वामित्वमा रहेको नेपाल बैंकले यसपालि भने कोरोना भाइरसको सङ्क्रमणको जोखिमका कारण दसैंमा नयाँ नोट वितरण नगर्ने जनाएको छ ।
हेर्टौंडामा पनि दैनिक कोरोना भाइरसको सङ्क्रमण बढिरहेको छ । भीडभाड धेरै हुने हुँदा स्वास्थ्यका दृष्टिकोणले पनि यो वर्ष नयाँ नोट उपलब्ध नगराइने भएको हो । अहिलेको अवस्था कोरोना भाइरसको कारण सामान्य नरहेको भन्दै नयाँ नोट वितरण नगरिने भएको नेपाल बैंक हेटौंडा शाखाका प्रबन्धक यमनाथ दाहालले बताउनुभयो । दसैंमा मानिसहरुले नयाँनोटले पुजाआजा गर्ने तथा दक्षिणा दिने चलन छ । यस्तै नयाँ नोट साट्न सर्वसाधारणहरुको बैंक अगाडि ठूलै भीडभाड हुने गरेको थियो । भिडभाड धेरै हुँदा कोरोनाको जोखिम धेरै हुने भएकाले यसपालि नयाँ नोट नसाटिने भएको उहाँले बताउनुभयो
।
नेपालमा अहिले प्रचलनमा ५ रुपैयाँ, १० रुपैयाँ, २० रुपैयाँ, ५० रुपैयाँ, १ सय रुपैयाँ, ५ सय रुपैयाँ र १ हजार रुपैयाँ रहेका छन् । यसअघि मकवानपुरमा नेपाल बैंकले प्रचलनमा रहेका नोटहरु पुरानो नोटसँग साट्ने गरेको थियो । यस्तै नेपालमा प्रचलनमा नरहेका १ रुपैयाँ, २ रुपैयाँ, २५ रुपैयाँ, २ सय ५० रुपैयाँ पनि छन् । यस्तो नोटहरु भने कुनै विशेष समारोहमा सरकारले छाप्ने गरेको छ । त्यस्तै सिक्काहरुमा १ रुपैयाँको सिक्का, २ रुपैयाँको सिक्का, ५ रुपैयाँ र १० रुपैयाँको सिक्काहरु नेपालमा प्रचलनमा छन् भने १ पैसा, २ पैसा, ५ पैसा, २५ पैसा, ५० पैसा प्रचलनमा हाल छैनन् । कोरोना महामारीको अवस्थामा सरकारले यो वर्ष आफ्नै घरमा बसेर चाडपर्व मनाउन भनेको छ । यस्तो अवस्थामा नेपाल राष्ट्र बैंकले पनि नयाँ नोट वितरण गर्ने, नगर्ने स्पष्ट धारणा सार्वजनिक गरेको छैन ।
