नसुनेको कुरा, थाहा नभएको विषय… एक्कासि विद्यालयमा हामीभन्दा अलि ठूला दाईदिदी भन्न सुहाउने ३–४ जना आउनुभयो । कुरा सुन्दै र बुझ्दै जाँदा उहाँहरू युथ थिङ्कर्स सोसाइटी चितवनबाट हुनुहुँदो रहेछ । उहाँहरू आएर हामीलाई नमूना संयुक्त राष्ट्रसंघ अर्थात मोडल युनाइटेड नेसन्स (मुन) बारे आवश्यक जानकारी दिएर जानुभयो । त्यसपछि हामी भाग लिएर तयार भयौँ अनि सिमुनका लागिÞ लगातार पुग्यौँ, दुई वर्ष चितवन । यस वर्ष भने शारीरिक रूपमा भेला भएर कार्यक्रम गर्न कोरोनाले दिएन । दुई वर्षको अनुभवका कारण हामी विद्यार्थीहरू पनि मुनका बारेमा जानकार नै थियौँ ।
त्यसैकारण पनि हामी आफैँले विद्यालयबाट नै भर्चुअल रूपमा मुन गर्ने सोच्यौँ र कार्यक्रम गर्ने निर्णय भयो, एनमुन कार्यक्रम विद्यालयले नै गर्ने । त्यही माथि पनि हामी विद्यार्थीले नेतृत्व गर्ने कुरा शिक्षक टोलीको बैठकबाट बाहिरियो । मुन गर्नका लागि मूर्त, अमूर्त रूपमा धेरै व्यक्ति चाहिन्थ्यो । तर, कमिटिमा गरिने छलफलमा मुख्य भूमिकामा डायस (कमिटिको नेतृत्वकर्ता) र डेलिगेट्स (पार्टिसिपेन्ट्स्) नै हुन्छन् । डेलिगेट्स त विद्यालयकै विद्यार्थी हुन्छन् तर डायस कहाँबाट ल्याउने भन्ने कुरा उठ्यो । तर, शिक्षकहरूको साथ हरेक काममा मिल्ने भएर होला ‘तिमीहरूले नै सक्छौँ’ भनेपछि हामी पनि पछि हटेनौँ र डायसको छनौटमा म लगायत मेरा साथीहरू गयौँ ।
भाग्यवस् हामी छनौट भएछौँ । त्यसपछि जिम्मेवारीका साथ यात्रा सुरू भयो नवोदय मोडल युनाइटेड नेसन्स (एनमुन) को…. । हामीले छनौट भइसकेपछि अब डेलिगेट्सका लागि पनि फारम खोलिदियौँ । विद्यार्थीहरूले फारम भर्दै गए र हामीले प्रशिक्षण कक्षाहरू सुरू गर्यौं । हाम्रो विद्यालयका विद्यार्थीहरूले सहभागिता जनाउँदै गइरहेका थिए । प्रशिक्षणपछि हरेक दिन हाम्रो बोर्ड बैठक पनि भइरहेको थियो । ‘हामीले अहिलेसम्म गरेका कार्यक्रमहरू जतिपनि छन्, ती सबैमा बाहिर विद्यालयका विद्यार्थीहरूले सधैं सहभागिता जनाउँथे, यस पालि पनि अरू विद्यालयलाई चाहिँ किन छुटाउने ? भनेर बैठकमा तरङ्ग उठ्यो ।
एकजनाबाट उठेको कुरालाई हामी सबैले सहभागिता जनायौँ र अरू विद्यालयलाई नि हाम्रो कार्यक्रममा संलग्न गराउने निर्णय भयो । भोलिपल्ट विभिन्न विद्यालयमा निमन्त्रणा पठाइयो । पर्सिपल्टबाटै विद्यालयबाट विद्यार्थीहरू आउन थाले, मकवानपुर, चितवन, बारा… अन्य ठाउँबाट । त्यसपछि सबै विद्यार्थीहरूको समग्रमा दिनदिनै प्रशिक्षण सुरू भयो ।
यही असोज १५, १६ र १७ गतेका दिन कार्यक्रम हुने निधो भयो र व्यानरहरू विद्यालयको फेसबुक पेजबाट बाहिरियो । १४, १५ दिनको प्रशिक्षण पश्चात् अब एनमुनको मिति छ । मुनका लागि छनौट गरिएको सेक्रेटरी, डायसहरू अनि प्रेसका विद्यार्थीहरू कार्यक्रम तयारीमा व्यस्त छन् । डेलिगेट्सहरू रिसर्चमा मस्त । नवोदयमा पहिलो एनमुनको माहोल छ ।
नवोदय शिशु सदन, कक्षा १०
