केही समययता विद्यालयमा अतिरिक्त क्रियाकलापको अभ्यासमा विद्यालय परिवार, अभिभावक र सरोकारवालाको ध्यान केन्द्रित भइरहेको छ । अतिरिक्त क्रियाकलापअन्तर्गत पनि साहित्यिक क्रियाकलाप प्राथमिकतामा परिरहेको देखिन्छ । विद्यालयले विद्यार्थीलाई साहित्य रचना र प्रस्तुतीमा मात्रै नभएर त्यस्ता कार्यक्रमको व्यवस्थापन, सञ्चालनमा पनि जिम्मेवारी दिने गरेको छ । हेटौंडा–५ स्थित जिएस निकेतन माविले विद्यार्थीको सुनौलो बिहानी समूह गठन गरेर साहित्यिक क्रियाकलाप गरिरहेको छ । विद्यालयमा साहित्यिक क्रियाकलापकै विषयलाई लिएर सुनौलो बिहानी समूहका कार्यवाहक अध्यक्ष निश्चल राज गौतमसँग समाज सम्पादक सुरेश श्रेष्ठले गर्नुभएको कुराकानीः
समाजः सुनौलो बिहानी समूहले के कस्ता साहित्यिक क्रियाकलापहरु, के–कसरी गरिराखेको छ ?
गौतमः हामीले अग्रज साहित्यकारहरुको सम्झनामा कार्यक्रमहरु गर्ने गरेका छौं । कविता, कथा लेख्न प्रतियोगिताहरु गर्दै आएका छौं । अहिले हामी कोभिड–१९ को महामारी छौं । त्यसैले भर्चुअल रुपमा हामी जोडिरहेका छौं । अहिले हामीले विभिन्न साहित्यकारहरुको सम्झनामा कार्यक्रम गर्ने गरेका छौं ।
समाजः अतिरिक्त क्रियाकलापअन्तर्गत साहित्यिक समूहमा सहभागी भएर विद्यार्थीको औपचारिक अध्ययनमा के–कस्तो खालको सहयोग पुगेको छ ?
गौतमः एकदमै सहयोग पुगेको छ । किन कि हामी विद्यार्थी हौं । विद्यार्थी भइसकेपछि हामीले यो साहित्य सिर्जना गर्दैगर्दा हामीले धेरै सिक्न सक्छौं । जस्तै हामीले आफ्नै पाठ्यक्रममा पनि कुनै प्रश्नोत्तर लेख्दाखेरी साहित्यिक कुराहरु आयो भन्ने हामीलाई एकदमै सजिलो हुने गरेको छ । तार्किक उत्तर, भाव विस्तार लगायतका यावत कुराहरुमा हामीलाई एकदमै सहयोग पुगेको छ ।
समाजः सुनौलो बिहानी समूहमा कति विद्यार्थीहरु सहभागी छन् ? साहित्यिक गतिविधीमा कुन उमेर, कक्षा समूहका विद्यार्थी सहभागी हुन पाउँछन् ?
गौतमः सुनौलो बिहानी समूहको समितिमा हामी १५ जना छौं । त्यति मात्र नभएर अरु १६ वटा समूहहरु छन् । अतिरिक्त क्रियाकलापका समूहहरुमा धेरै विद्यार्थीहरु जोडिएका छौं । हामीले आयोजना गर्ने कार्यक्रमहरुमा भने कक्षा ४, ५, ६ देखिका भाईबहिनीहरुलाई जोड्ने गरेका छौं । त्यति मात्र नभएर अन्य विद्यालयका विद्यार्थीहरुलाई पनि सम्भव भएसम्म हामीले कार्यक्रमहरुमा जोडिरहेका छौं ।
समाजः तपाईहरुका लागि विद्यालयले, शिक्षकहरुले के–कसरी सहजीकरण गरिराख्नु भएको छ ?
गौतमः हामीलाई अतिरिक्त क्रियाकलाप प्रमुख आदरणीय दिपक गुरु, विद्यालयका प्रधानाध्यापक ईश्वर सरलगायत अन्य शिक्षकहरुले हामीलाई मोटिभेट गरिरहनु हुन्छ । हामीले केही सहयोग चाहिएको खण्डमा उहाँहरुले सहयोग पनि गर्नुहुन्छ । जस्तै हामीले यो भैरव अर्याल विशेष कार्यक्रममा एउटा सम्मान कार्यक्रम राखेका थियौं । आदरणीय आसी रिजाल सरलाई सम्मान गर्दै नगद १० हजार १ सय रुपैयाँ हाम्रो विद्यालयले प्रदान गरेको छ । हाम्रो आयोजनामा उहाँलाई सम्मान कार्यक्रम गरिएको थियो । यसरी नै हाम्रो विद्यालय तर्फबाट पनि सहयोगहरु मिलिरहेको छ ।
समाजः परिवारको तर्फबाट, परिवारका सदस्यहरुबाट तपाईहरुलाई कस्तो सहयोग प्राप्त भइराखेको छ ? यो साहित्यिक गतिविधिमा लागेर तपाईका अभिभावकहरु, दाई–दिदीहरु कति सन्तुष्ट हुनुहुन्छ ?
गौतमः एकदम सन्तुष्ट हुनुहुन्छ । किन कि मेरो बाबा, मेरो दिदी पनि साहित्यिक क्रियाकलापहरुमा संलग्न हुनुहुन्छ । उहाँहरु पनि साहित्यमा सक्रिय हुनुहुन्छ । विभिन्न साहित्यिक रचना लेख्नु हुन्छ । उहाँहरुले हामीलाई एकदम मोटिभेट गर्नुहुन्छ । साहित्यमा लाग्नुपर्छ, साहित्यले समाजलाई परिवर्तन गर्न सक्छ भन्नुहुन्छ । सहित्यमा लाग्दै गर्दाखेरी विभिन्न कुराहरु साहित्य मार्फत हामीले एउटा समाज परिवर्तनका कुराहरुलाई जोड्न सक्छौं । अभिभावक र दाईदिदीहरुबाट सहयोग हुन्छ । र हामी एकदमै खुसी छौं ।
समाजः सुनौलो बिहानी समूहमा रहेर गरिएको अनुभवको आधारमा अरु के के गर्न सकिन्छ भन्ने लागेको छ ?
गौतमः सुनौलो बिहानी समूहका कोर कमिटीमा हाम्रो एउटा समूह छ । हामीले साना भाईबहिनीहरुलाई पनि जिम्मेवारी दिएर साहित्यिक कार्यक्रम गरिरहेका हुन्छौं । हामी आफैं र साना भाइबहिनीहरुलाई राष्ट्रियस्तरमा एउटा एक्सपोजर दिन सक्यौं भनेदेखि अझ राम्रो हुन्छ भन्ने लागिरहेको छ । र हाम्रो आदरणीय गुरु दिपक सर साहित्यिक प्रशिक्षण कार्यक्रमहरु पनि गरिरहनु भएको छ । त्यसको कारणले गर्दा पनि एकदमै कक्षा ६ र ७ कक्षाका भाईबहिनीहरुलाई पनि बाहिर राष्ट्रियस्तर कार्यक्रममा जोडिएका छन् ।
