हेटौंडाः आसन्न स्थानीय तहमा मतदाताको ध्यान, मन र मत आकर्षित गर्न उम्मेदवारहरुले आकर्षक घोषणपत्र तयार पार्ने गरेका छन् । घोषणापत्रलाई हेर्दा मतदाता आकर्षित हुने तर नपत्याउने जोखिम पनि रहन्छ ।
हेटौंडा उपमहानगरपालिका वडा नम्बर ८ को अध्यक्ष पदका उम्मेदवार राम थापाले आम मतदातालाई आकर्षिक गर्ने गरी वडाका प्रत्येक विद्यालयमा आविस्कार केन्द्र स्थापना गर्नेदेखि चिकित्सा शिक्षा, इन्जिनियरिङ र चार्टर्ड एकाउन्टेन्ट विषय अध्ययन गर्न चाहने विद्यार्थीलाई ५ लाखदेखि २० लाख रुपैयाँसम्म सहयोग गर्ने घोषणा गर्नुभएको छ ।
शुक्रबार पत्रकार सम्मेलन गरेर आम मानिसका लागि आश्चर्य जस्तो लागे पनि विद्यालयमा आविस्कार केन्द्र र उच्च शिक्षा अध्ययनका लागि शैक्षिक अनुदान कार्यक्रम सञ्चालन गर्न सम्भव भएको थापाले दावी गर्नुभयो । वडाको आन्तरिक स्रोत या दाताको खोजी गरेर भए पनि वडाका विद्यार्थीलाई आकर्षक शैक्षिक कार्यक्रममा सहभागी हुन सहयोग गरिने थापाको भनाइ छ । नेकपा माओवादी केन्द्र, राप्रपा, नेकपा एकीकृत समाजवादी र जनता समाजवादी पार्टीका सदस्यसहित नेपाली कांग्रेसको तर्फबाट अध्यक्षको उम्मेदवार बन्नु भएका राम थापा आफ्नो समूह निर्वाचित भए विज्ञ समूहको सल्लाहमा उपयुक्त योजना बनाएर काम गर्ने बताउनुभयो ।
नेपाली कांग्रेसको सक्रिय सदस्य थापाले चुनावी नतिजा सकारात्मक नभए पनि वडाको विकासका लागि रचनात्मक क्रियाकलाप गरिरहने बताउनु भयो । २०४६ सालको राजनीतिक परिवर्तनयता कम्युनिष्टले लगातार काम गरे पनि वडाको विकासमा उल्लेखनीय काम हुन नसकेको जीकिर गर्नुहुँदै आफ्नो समूह निर्वाचित भए सुन्दर वडाको रुपमा विकास गर्ने थापाले बताउनुभयो ।
