हेटौँडाः बागमती प्रदेशका मुख्यमन्त्री बहादुर सिंह लामाले आकस्मिक रुपमा मन्त्रिपरिषद् बैठक आह्वान गर्नुभएको छ । काठमाडौंमा बस्नेगरी मुख्यमन्त्री लामाले आकस्मिक मन्त्रिपरिषद् तोक्नुभएको छ ।
मन्त्रिपरिषद् बैठक बस्न नुवाकोटमा रहनुभएका मुख्यमन्त्री लामा काठमाडौं जाँदै हुनुहुन्छ । उहाँले सबै मन्त्रीहरुलाई साँझको मन्त्रिपरिषद् बैठक बारे जानकारी गराइसक्नुभएको छ । मन्त्रिपरिषद् बैठकका लागि मुख्यमन्त्री लामा मन्त्रीहरु खोज्न लाग्नुभएको छ ।
केही मन्त्रीहरु विभिन्न कार्यक्रममा राजधानी बाहिर रहेको र विपद्को कारण बाटोमा नै अड्किएकाले उहाँहरुसँग सम्पर्कको प्रयत्न भइरहेको मुख्यमन्त्री लामाले बताउनुभएको छ । मन्त्रीहरुसँग सम्पर्क गरिसके लगत्तै मन्त्रिपरिषद् बैठक बस्ने उहाँको भनाई छ । भौतिक रुपमा उपस्थित हुन नसक्ने मन्त्रीहरुलाई प्रविधिको माध्यमबाट बैठकमा जोड्ने तयारी भएको मुख्यमन्त्री लामाले जानकारी दिनुभयो ।
“केहीबेरमा मन्त्रिपरिषद् बैठक बस्ने तयारी छ । मन्त्रीहरुसँग सम्पर्क गर्न खोजिरहेको छु । केही मन्त्री जिल्ला÷जिल्ला पुग्नु भएको छ । उहाँहरुलाई सूचना पठाइसकेको छु । सम्भव हुनेलाई भौतिक रुपमा सहभागी गराउने र बाहिर हुने मन्त्रीहरुलाई प्रविधि मार्फत् जुम मिटिङमा जोड्ने तयारी छ” मुख्यमन्त्री लामाले समृद्ध समाजसँग कुरा गर्दै भन्नुभयो, “आन्तरिक मामिला तथा कानुन मन्त्री दुम्जामा सडक बन्द भएर रोकिनु भएको छ । आर्थिक मामिला तथा योजना मन्त्री हेटौँडा मै हुनुहन्छ । उहाँहरुलाई त्यतै रहन भनेको छु । म पनि नुवाकोटमा छु । एक घण्टामा काठमाडौं पुग्छु । काठमाडौंमा रहेका मन्त्रीहरुलाई उपस्थित हुन सम्पर्क गरिरहेको छु ।”
बागमती प्रदेशले विपद्का कारण धेरै क्षति व्यहोरेकाले नागरिकलाई सम्बोधन गर्नेगरी मन्त्रिपरिषद् बैठक तय गरेको मुख्यमन्त्री लामाले बताउनुभयो । विपद्को समयमा नागरिकको राहत, उद्दार, व्यवस्थापनका बारेमा छलफल गरी निर्णय गर्न बैठक स्ने तयारी गरिएको उहाँले बताउनुभएको छ ।
