हेटौँडाः हेटौंडा–काठमाडौं छोटो दुरीको सिस्नेरी–दक्षिणकाली सडकमा १२ दिन सवारी संचालनमा रोक लगाइएको छ । काठमाडौं जिल्लाको दक्षिणकाली नगरपालिकाले सोमबार एक सूचना जारी गर्दै सो सडकमा १२ दिन सवारी संचालनमा रोक लगाइएको जनाएको छ ।
दक्षिणकाली–छैमले खण्ड कालोपत्रे कार्य सुरु गर्न सवारी आवागमनमा रोक लगाइएको सूचनामा उल्लेख छ । नगर प्रमुख मोहन बस्नेतका अनुसार सडक कालोपत्रे गर्न सवारी चापका कारणले कठिनाई भएकाले असोज ८ गतेदेखि असोज १९ गतेसम्म (१२ दिन) सवारी साधनलाई रोक लगाइएको हो । नगरपालिकाले सो सडक बन्द हुँदा सवारी साधनलाई वैकल्पिक मार्ग प्रयोग गर्न, गराउन जिल्ला प्रशासन कार्यालय काठमाडौं र जिल्ला प्रशासन कार्यालय मकवानपुरलाई समन्वयका लागि अग्रह गरेको छ ।
सो सडक राजधानी पूर्वाधार विकास विशेष आयोजना, हेटौंडा अन्तर्गत ठेक्का लगाएर निर्माण कार्य भइरहेको छ । बागमती प्रदेश सरकारको लगानीमा निर्माण भइरहेको उक्त सडक प्रादेशिक सडक गुरुयोजना अन्तर्गतको प्रदेश लोकमार्ग कायम गरिएको छ ।
