हेटौँडाः बागमती प्रदेश सरकारले पेरिस पारा ओलम्पिकमा पदक विजेता खेलाडी पलेशा गोवद्र्धनलाई १० लाख रुपैयाँ नगदसहित सम्मान गर्ने भएको छ । संविधान दिवसको अवसरमा प्रदेश सरकारले पलेशालाई १० लाख रुपैयाँ नगदसहित सम्मान गरेर नगरपरिक्रमा गराउने भएको हो ।
पेरिस पारा ओलम्पिकमा कांस्य पदक विजेता पलेशालाई संविधान दिवसको अवसरमा असोज ३ गते बिहिबार भोलि हेटौंडामा नगरपरिक्रमासहित सम्मान गर्ने तयारी भएको प्रदेशका युवा तथा खेलकुद मन्त्री मीनकृष्ण महर्जनले जानकारी दिनुभयो । उहाँका अनुसार पलेशासहित उनका प्रशिक्षक कविराज नेगीलाई ३ लाख र नेपाल तेक्वान्दो संघ बागमती प्रदेश समितिलाई ३ लाख रुपैयाँ प्रदान गरिनेछ ।
त्यस्तै १९ औं एसियाली खेलकुदमा करातेमा नेपाललाई ऐतिहासिक रजत पदक दिलाएकी एरिका गुरुङलाई ५ लाख रुपैयाँसहित सम्मान गरिने मन्त्री महर्जनले बताउनुभयो । एरिकाले एसियाडमा महिला ६८ केजी तौल समूहमा रजत पदक जितेकी थिइन् । एरिकाले २५ वर्षपछि नेपाललाई करातेमा रजत पदक दिलाएकी हुन् । यसअघि सविता राजभण्डारीले देशलाई रजत पदक दिलाएकी थिइन् । नेपालका लागि सन् १९९८ मा बैंककमा भएको १३ औं एसियाली खेलकुदमा तेक्वान्दोकी सविताले पहिलो पटक रजत दिलाएकी थिइन् ।
प्रदेश सरकारले एरिकाको प्रशिक्षक कुशल श्रेष्ठलाई १ लाख रुपैयाँ र नेपाल कराते महासंघ बागमती प्रदेश समितिलाई २ लाख रुपैयाँ प्रदान गर्ने भएको छ । प्रदेश सरकारले आफ्नो क्षेत्राधिकारमा रहेर देशलाई अन्तर्राष्ट्रियस्तरमा चिनाउने खेलाडीहरुलाई पुरस्कृत गर्ने मन्त्री महर्जनले बताउनुभयो । खेलकुद क्षेत्रको विकास र खेलाडी प्रोत्साहनमा प्रदेश सरकारले लगानी बढाउने उहाँले बताउनुभयो । गत भदौ २६ गतेको मन्त्रिपरिषद्बाटै उक्त निर्णय गर्ने तयारी भएपनि कानुनी समस्याका कारण निर्णय हुन नसकेको उहाँले जानकारी दिनुभयो । मुख्यमन्त्री बहादुर सिंह लामाको योजना अनुसार संविधान दिवसको अवसरमा पदक विजेता खेलाडी, प्रशिक्षक र प्रदेश समितिलाई पुरस्कृत गरिने उहाँको भनाइ छ ।
