हेटौंडाः मकवानपुरको मनहरी गाउँपालिकामा जारी प्रथम संस्करणको जोन राना मगर स्मृति फुटबल प्रतियोगिताको सेमिफाइनल समीकरण पूरा भएको छ । गाउँपालिका वडा–६ स्थित जोगीताल मैदानमा क्वार्टरफाइनल चरणको अन्तिम दुई खेलहरु सम्पन्न भएसँगै प्रतियोगिताको सेमिफाइनल समीकरण पूरा भएको हो ।
सयपत्री युवा क्लबको आयोजनामा सञ्चालन भइरहेको प्रतियोगिताअन्तर्गत बिहीबार भएको पहिलो क्वार्टरफाइनल खेलमा लालीगुराँस क्लबलाई २–१ गोल अन्तरले हराउँदै एफसी मिन्थाले सेमिफाइनलमा आफ्नो स्थान बनाएको छ भने राइनो एफसीलाई २–० गोलले हराउँदै आयोजक सयपत्री ‘बी’ले सेमीफाइनलमा आफ्नो स्थान बनाएको छ ।
एफसी मिन्थाबाट मनिष पौडेल र मिलन स्याङ्तानले समान एक–एक गोल गरेका हुन् भने लालीगुराँसको तर्फबाट सुलभ थापाले मात्रै एक गोल फर्काउन सफल भएका छन् । यस्तै, आयोजक सयपत्री ‘बी’को जीतमा सन्तोष थिङ र रमेश मुक्तानले समान एक–एक गोल गरेका हुन् । प्रतियोगिताको सेमिफाइनल खेल भोलि शनिबार हुने खेलतालिकामा उल्लेख गरिएको छ ।
पहिलो सेमिफाइनल खेलमा फाइनल प्रवेशका लागि आयोजक सयपत्री ‘बी’ र रमनटार एफसीबीच प्रतिस्पर्धा हुनेछ भने दोस्रो सेमिफाइनल खेलमा फाइनल प्रवेशका लागि आयोजक सयपत्री ‘ए’ र एफसी मिन्था क्लबबीच प्रतिस्पर्धा हुनेछ । सेमिफाइनल चरणको खेलहरु सम्पन्न भएपछि फाइनल प्रतिस्पर्धीको टुङ्गो लाग्नेछ ।
प्रतियोगिताबाट हेटौंडा फुटबल एकेडेमी, विजयुन एफसी, चितवन जिल्लाको भरतपुर महानगरपालिका, योगज्योति क्लब, बेलचोक, सुनादेवी एफसी मनहरी, एफसी सिम्पानी, लामिटार, कमलादेवी, सशस्त्र प्रहरी बलको एपीएफ, जय मनकामना, मिसन–८४, जनहित, लालीगुराँस नयाँबस्ती र राइनो एफसीका टिम बाहिरिइसकेको छ ।
२०७२ सालको भूकम्पमा परेर निधन भएका राना मगरको स्मृतिमा सयपत्री युवा क्लबले यस वर्षबाट प्रतियोगिता आयोजना गरेको हो । प्रतियोगिताका लागि प्रथम पुरस्कारको प्रायोजन स्वर्गीय जोनका दाजु जकै राना मगरले गर्नुभएको छ भने द्वितीय पुरस्कारको प्रायोजन सुनाचुरी सामुदायिक वन उपभोक्ता समूहले गरेको बताइएको छ । प्रतियोगितालाई सफतापूर्वक सम्पन्न गर्नका लागि प्रहरी परिचालन, स्वयम्सेवकको व्यवस्था र मनोज जिम्बाको संयोजकत्वमा सुरक्षा व्यवस्था समिति गठन गरेको छ । प्रतियोगिताका लागि विभिन्न निकायहरुबाट सहयोग प्राप्त भएको आयोजक कमिटीले जानकारी दिएको छ ।
प्रतियोगिताको उपाधि विजेता टिमले ३० हजार रुपैयाँ नगदसहित शिल्ड, मेडल तथा प्रमाणपत्र प्राप्त गर्नेछ भने उपविजेता टिमले १५ हजार रुपैयाँसहित शिल्ड, मेडल तथा प्रमाणपत्र प्राप्त गर्नेछ । यस्तै, विधागत खेलाडीहरु उत्कृष्ट खेलाडी, उत्कृष्ट गोलरक्षक, हाइ स्कोरर, उत्कृष्ट फरवार्डलगायतका खलाडीहरुले २ हजार रुपैयाँ नगद राशिसहित ट्रफी प्राप्त गर्नेछन् । विभिन्न खेलाडीहरुलाई फुटबल खेलको महत्व बुझाउन, खेलाडीको प्रतिस्पर्धात्मक क्षमता बढाउन र खेलाडीहरुबीच भातृत्व कायम गराउनका लागि क्लबले प्रतियोगिता आयोजना गर्न सुरु गरेको बताएको छ । प्रतियोगितालाई निरन्तरता दिने आयोजक कमिटीको योजना रहेको छ । प्रतियोगिताको फाइनल खेल आउँदो सोमबार हुनेछ । प्रतियोगिताका लागि करिब १ लाख ३० हजार रुपैयाँ खर्च हुने आयोजकको अनुमान छ ।
