हेटौँडाः बामगती प्रदेशका युवा तथा खेलकुद मन्त्री मीनकृष्ण महर्जनले हेटौंडाको गौरीटार रंगशालाको स्थलगत अवलोकन गर्नु भएको छ । मन्त्री महर्जनले सोमबार बिहान हेटौंडा–६ स्थित गौरीटारमा निर्माणाधीन रंगशालाको निरिक्षण गर्नु भएको हो ।
मन्त्री महर्जनले गौरिटार रंगशालामा निर्माणाधीन त्रिकेट तथा फुटबल मैदान र पौडी पोखरीको निरिक्षणगर्नु भएको हो । मन्त्री महर्जनले गत बैशाखमा शिलान्यास गरिएको क्रिकेट रंगशाला र पौडी पोखरीको निरिक्षण गर्नु भएको हो । निरिक्षणका क्रममा मन्त्रालयका सचिव रुद्र प्रसाद लामिछाने र प्रदेश खेलकुद परिषदका इन्जिनियर निवेश बर्तौलाले व्रिफिङ गर्नु भएको थियो ।
प्रदेश सरकारले गत आर्थिक वर्षदेखि क्रिकेट रंगशाला निर्माणका लागि १२ करोड र स्विमिङ पुल निर्माणका लागि ९ करोड रुपैयाँ बजेट विनियोजन गरेर निर्माण थालेको इन्जिनियर बर्तौलाले बताउनुभयो ।
उक्त रंगशालामा पहिलो चरणमा ६०० जना दर्शक क्षमताको एउटा प्यराफिट सहिता ५ वटा पिच, ७० मिटर रेडिएसको ग्राउण्ड भिभिआइपी कक्ष, खेलाडी कक्ष (प्लेयर बक्स), चेन्जिङ रुम (कपडा फेर्ने कोठा), टिभी र रेडियो ब्रोडकास्टिङ कक्ष, मिडिया कक्ष, अपांगमैत्री क्षेत्र, पार्किङलगायत संरचना निर्माण हुने उहाँले बताउनुभयो ।
आगामी एक वर्ष भित्र सो संरचना निर्माण सम्पन्न गर्नुपर्ने गरी ठेक्का मार्फत् काम भइरहेको प्रदेश खेलकुद विकास परिषदका इन्जिनियर बर्तौलाले बताउनुभयो ।
निरिक्षण पछि मन्त्री महर्जनले समय सिमा भित्रै निर्माण कार्य सम्पन्न गर्ने पहल र निर्माण कम्पनीलाई दवाव दिने बताउनुभयो । खेलकुद क्षेत्रमा निर्माण कार्य अत्यन्त सुस्त हुने गरेकाले प्रदेश सरकारले तत्काल निर्माण कम्पनीलाई उपस्थित गराएर काम छिटो सक्न निर्देशन गर्ने उहाँको भनाई छ । प्रदेश सरकारले खलकुद क्षेत्रको विकासका लागि स्तरिय खेलकुदका संरचनासंगै खेलाडी प्रोत्साहनमा समेत काम गर्ने लक्ष्य लिएको उहाँले बताउनुभयो ।
उनले रंगशाला भित्र निर्माण भइरहेका २ वटै खेलकुद संरचनाको निर्माणको जिम्मा लिएका कम्पनीका प्रतिनिधिलाई उपस्थित गराउने निर्देशन समेत दिनुभएको छ । राज्यका निकायका कमजोरी, मन्त्रीहरुको खबरदारी नहुँदा खेलकुदका संरचनाहरु अलपत्र पर्ने गरेकाले त्यसलाई रोक्नुपर्ने उहाँले बताउनुभयो ।
केन्द्रीय खेलकुद प्रतिष्ठान (गौरीटार रंगशाला) का रुपमा विकास गर्नेगरी तत्कालिन समयमा राष्ट्रिय खेलकुद परिषद्ले खेलकुदका संचना निर्माणको थालनी गरेको थियो । बजेटले निरन्तरता पाउन नसक्दा १४ वर्षसम्म सो रंगशाला निर्माणले गति लिन सकेको थिएन । २८ जेठ ०६४ मा तत्कालीन प्रधानमन्त्री माधवकुमार नेपालबाट शिलान्यास भएको गौरिटार रंगशालाको शिलान्यास गरेका थिए । गौरीटार रंगशालामा विभिन्न विधा १९ वटा विभिन्न खेलकुद सम्बन्धित संरचना निर्माण गरिने योजना अनुसार काम सुरु गरिएको थियो ।
राष्ट्रिय तथा अन्तर्राष्ट्रियस्तरका खेलकुद प्रतियोगितामा सहभागी हुने नेपाली खेलाडीलाई बन्द प्रशिक्षणमा राख्ने उद्देश्यसहित निर्माण गर्न लागिएको यस रंगशालामा फुटबल, भलिबल, क्रिकेटका लागि खेल मैदान, स्विमिङ पुल, छात्र र छात्रा होस्टल, प्रशासनिक भवन लगायतको संरचना निर्माण गर्ने परिषद्को योजना थियो ।
देश संघीय संरचनामा गएसँगै रंगशाला निर्माणको काम प्रदेश सरकारअन्तर्गत रहेको उक्त आयोजनामा क्रमागतबाट बजेट विनियोजन गरिदै आएको छ । फुटबल ग्राउन्ड, रनिङ ट्र्याक सिन्थेटिक, भीआईपी प्यारापिट र लाइटिङ गरी ९० करोड रुपैयाँको लागत अनुमानसहित डीपीआर तयार पारेर काम गरिरहेको छ ।
