हेटौँडाः बागमती प्रदेश सरकारमा मन्त्री नियुक्तिका विषयमा कांग्रेसमा किचलो चर्किएको छ । प्रदेशको १३ मन्त्रालय मध्ये मुख्यमन्त्री बाहेक ६ मन्त्रालयको भाग पाएको कांग्रेसले बिहिबार एक बिना विभागीयसहित ४ मन्त्रीको सपथ ग्रहण गर्ने तयारी गरेको थियो । तर, अन्तिम समयमा सपथ ग्रहण रोकियो ।
कांग्रेसले पाएको ६ मन्त्रालयमा बुधबार नै ३ मन्त्री नियुक्ति गरेको थियो । बिहिबार भने कांग्रेसले ४ मन्त्रीलाई सपथ ग्रहण गराउने तयारी गरेको थियो । कांग्रेसले जिम्मेवारीसहित सुरजचन्द्र लामिछाने, प्रभात तामाङ, मीनकृष्ण महर्जन र बिमल ठकुरीलाई मन्त्रीको सपथ ग्रहण गराउने गरी ५ः३० बजेको समय निर्धारण गरेको थियो ।
सोही अनुुसार उनीहरुको जिम्मेवारी समेत निर्धारण गरी मन्त्रीमा नियुक्त गरी मुख्यमन्त्री तथा मन्त्रिपरिषद् कार्यालयबाट मन्त्रीको सपथका लागि प्रदेश प्रमुख कार्यालयमा पत्राचार गरिएको थियो । प्रदेश प्रमुख कार्यालयले मन्त्रीको सपथका लागि कार्यभार तोके अनुसार सपथका लागि पत्र समेत तयार गरेको थियो । पत्रसहित सपथ ग्रहणका लागि हलमा प्रवेश गर्ने तयारी गर्दै गर्दा विवाद भएपछि कार्यक्रम रोकिएको थियो ।
प्रदेश प्रमुखको कार्यालयले तयार गरेको पत्रअनुसार बिहिबार नियुक्त हुनुभएका ठकुरीले संस्कृति पर्यटन तथा सहकारी मन्त्रालय, लामिछानेले आन्तरिक मामिला तथा कानुन मन्त्रालय, तामाङले आर्थिक मामिला तथा योजना मन्त्रालय र महर्जनले युवा तथा खेलकुद मन्त्रालयको जिम्मेवारी पाउने भएका थिए ।
बुधबार नियुक्त भई सपथ गरेका कुन्दनराज काफ्ले, श्याम बहादुर खड्का र मदु कुमार श्रेष्ठको जिम्मेवारी समेत तोकिएको थियो । जसमा काफ्लेले सामाजिक विकास मन्त्रालय, खड्काले खानेपानी, उर्जा तथा सिंचाई मन्त्रालय पाउने गरी जिम्मेवारी तोकिएको थियो भने श्रेष्ठको जिम्मेवारी पछि तोकिने गरी बिना विभागीय मन्त्री बनाउने तय भएको थियो ।
उक्त निर्णयमा काफ्ले र श्रेष्ठले असहमति जनाएपछि सपथ ग्रहण कार्यक्रम भाँडिएको थियो । सामाजिक विकास मन्त्रालयको जिम्मेवारी दिने तयारी भएपछि काफ्ले मन्त्री पदमा नरहने निर्णयमा पुग्नुभयो । काफ्लेले पदबाट राजिनामा दिने बताउनुभयो । सरकार गठन ताका भौतिक पूर्वाधार विकास मन्त्रालयमा आकांक्षा राखेका काफ्लेले भागबण्डामा सो मन्त्रालय एमालेको भागमा परेपछि आर्थिक मामिला तथा योजना मन्त्रालयको जिम्मेवारी पाउने निश्चित भएको थियो । कांग्रेस एमाले बीच भौतिक र आर्थिक मन्त्रालय साटफेर भएपछि काफ्ले आर्थिक मामिला तथा योजना मन्त्रालय पाउने पक्कापक्की भएको थियो । तर, बिहिबार आर्थिक मामिला मन्त्रालयमा प्रभात तामाङको नाम फाइनल भएपछि उहाँ सामाजिक विकास मन्त्रालयमा पर्नुभएको थियो ।
यता बिना विभागीय मन्त्री रहने निश्चित भएका श्रेष्ठले जिम्मेवारी नतोकेसम्म अघि बढ्न नहुने अडान कायम राख्नुभयो । जिम्मेवारी तोकेर अघि बढ्नु पर्ने उहाँको मागपछि मन्त्रीहरुको सपथग्रहण थप अन्योलमा परेको थियो । मन्त्री श्रेष्ठका अनुसार आकांक्षी धेरै भएकाले कांग्रेसमा मन्त्री नियुक्तिमा केही असहज भएको हो । मन्त्रीहरुको कार्यक्षेत्र निर्धारणका विषयमा कसैको पनि निर्धारण नभएको उहाँले बताउनुभयो ।
