हेटौंडाः राष्ट्रिय मुक्ति क्रान्ति अभियानका केन्द्रीय संयोजक राजेन्द्र महतोले बागमती प्रदेशको नाम खारेज तत्काल गर्नुपर्ने बताउनुभएको छ । बुधबार हेटौंडामा भएको जनप्रदर्शनलाई सम्बोधन गर्नुहुँदै उहाँले यस्तो बताउनुभएको हो ।
संयोजक महतोले सरकारले केही जातजातिहरुको भाषा, संस्कृति र अधिकार खोसेको आरोप लगाउनुभएको छ । उहाँले जातिको पहिचार र अधिकारलाई खोसेर प्रदेशको नाम अरु नै राखेको बताउनुभयो । उहाँले पहिचानको आधारमा बागमती प्रदेशको नाम तत्काल खारेज गरी ताम्सालिङ राख्नुपर्ने बताउनुभयो ।
उहाँले अहिले देशमा एकलवाद राज्य प्रणाली रहेको भन्दै तत्काल बहुल राष्ट्रिय राज्यवाद हुनुपर्ने बताउनुभएको छ । उहाँले आ–आप्mनो पहिचानका लागि क्रान्ति गर्न आवश्यक रहेको बताउनुभएको छ । आफूहरु ३५ वर्षदेखि मधेसमा पहिचानका लागि लड्दै आइरहे पनि अझै अधिकार पाउन नसकेको भन्दै देशव्यापीरुपमा नै मोर्चा बनाएर अगाडि बढेको बताउनुभयो । एक्काएक्लै लड्दा अधिकार नपाएको भन्दै मोर्चा बनाएर अभियान सुरु गरेको महतोको भनाइ छ ।
कार्यक्रमका संयोजक बुद्ध छिरिङ मोक्तानले बागमती प्रदेशको नाम आफूहरुलाई स्वीकार्य नभएको बताउनुभयो । उहाँले अहिले पहिचानको आधारमा प्रदेशको नामाकरण नगरिएको भन्दै तत्काल खारेज गरेर ताम्सालिङ हुनुपर्ने बताउनुभयो । उहाँले अरुको उपनिवेशमा बस्नुपर्ने राज्य व्यवस्था आफूहरुलाई मान्य नहुने बताउनुभयो । उहाँले प्रदेशका नाम तत्काल खारेज नभएमा सिंहदरबार घेर्ने चेतावनीसमेत दिनुभएको छ ।
