हेटौंडाः मकवानपुरको मकवानपुरगढी गाउँपालिकामा उत्पादन भएका रैथाने बालीहरु राष्ट्रिय कार्यक्रममा प्रदर्शन हुने भएको छ । बिहीबार काठमाडौंमा कृषि तथा पशुपक्षी विकास मन्त्रालय र फुड एण्ड एग्रिकल्चरको संयुक्त आयोजनामा हुने कृषि सामग्री प्रदर्शनी कार्यक्रममा गढीका रैथाने बाली पनि प्रदर्शन गरिने पालिकाका कृषि शाखा प्रमुख चन्द्रकान्त चौधरीले जानकारी दिनुभयो ।
केही समयअगाडि उक्त कार्यक्रममा सहभागिताका लागि मकवानपुरगढी गाउँपालिकालाई सूचना आएको उहाँले बताउनुभयो । प्रदर्शनीमा देशभर उत्पादन भएका रैथाने बालीहरु प्रदर्शनी र बिक्री वितरणसमेत हुने प्रमुख चौधरीले बताउनुभयो । प्रदर्शनीमा गढीमा उत्पादन हुने कोदो, फापर, जुनेला, सिलामलगायतका रैथाने बालीहरु राखिने उहाँले बताउनुभयो । कोदोका प्रजातिहरु सेतो, कालो, रातो र धान कोदो प्रदर्शनीमा राख्ने उहाँले बताउनुभयो ।
पालिकाले अहिले कृषि क्षेत्रलाई प्राथमिकतामा राखेर काम गरिरहेको छ । पालिकाले पालिकाभित्रका किसानहरुले उत्पादन गरेको रैथाने बालीहरुको न्यूनतम समर्थन मूल्य तोकेर बिक्रीका लागि सहजीकरण गरिरहेको छ । पालिकाले कोदोको केजीको ५४ रुपैयाँ, फापरको १ सय रुपैयाँ र जुनेलोको ८४ रुपैयाँ न्यूनतम समर्थन मूल्य तोकेको छ । पालिकाले तोकेको सहकारीसँग बिक्री गरेमा प्रोत्साहनस्वरुप १० रुपैयाँ थप उपलब्ध गराइरहेको प्रमुख चौधरीले बताउनुभयो । जसमा ४ रुपैयाँ सहकारीले पाउनेछन् भने ६ रुपैयाँ किसानले पाउनेछन् ।
पालिकाले अहिले गढी–४ स्थित अपाङ्गता तथा विपन्न कृषि सहकारी संस्थासँग सहजीकरण गरेर किसानहरुले उत्पादन गरेको बाली खरिद गरिरहेको छ । यसवर्ष सहकारीले ७ टन कोदो, ५ टन फापर र १ टन जुनेलो खरिद गरेको छ । मकवानपुरगढीको ८ नम्बर वडामा कोदो, ४ नम्बर वडामा फापर र १ नम्बर वडामा बढी मात्रामा जुनेलो उत्पादन हुने गरेको छ । पालिकाले कृषकहरुले उत्पादन गरेको बालीहरुको न्यूनतम समर्थन मूल्य तोकिदिँदा किसानले कम रकममा बेच्नुपर्ने बाध्यता हटेको र बजारको सुनिश्चिता भएको प्रमुख चौधरीले बताउनुभयो ।
