हेटौंडाः नेपाल राष्ट्रिय शिक्षक संगठनको ऐतिहासिक प्रथम अधिवेशन आज शुक्रबारबाट हेटौंडामा सुरु हुँदैछ । बिहीबार हेटौंडामा पत्रकार सम्मलेलनको आयोजना गर्दै शिक्षक संगठन बागमती प्रदेश समितिले अधिवेशनबारे जानकारी गराएको हो ।
अधिवेशनको शुक्रबार संगठनका राष्ट्रिय समिति अध्यक्ष विष्णु भण्डारीले उद्घाटन गर्नुहुनेछ । अविधेशन हेटौंडा–४ स्थित रोयल प्यालेसमा बिहान ११ बजे सुरु हुनेछ । शनिबारसम्म चल्ने अधिवेशनमा प्रदेशभित्रका १३ जिल्लाका करिब ६ सय जना प्रतिनिधि सहभागी हुने संगठनका बागमती प्रदेश समिति अध्यक्ष नीरबहादुर कार्कीले बताउनुभयो । अधिवेशनबाट ३५ सदस्यीय बागमती प्रदेश समिति र तीन जना केन्द्रीय प्रतिनिधि निर्वाचित हुने अध्यक्ष कार्कीले बताउनुभयो । प्रदेश कार्यसमिति सकेसम्म सर्वसम्मत चयन हुने र त्यो सम्भव नभएमा निर्वाचन प्रणालीबाट चयन गरिने जनाइएको छ । २०३६ सालमा हेटौंडा–४ स्थित भूटनदेवी माविबाट सुरु भएको संगठनले अहिले गौरवपूर्ण इतिहास बोकेको अध्यक्ष कार्कीको भनाइ छ । त्यसैले प्रदेश अधिवेशन मकवानपुर जिल्लामा आयोजना गरिएको उहाँले बताउनुभयो । शिक्षक संगठन देशकै पेशागत आन्दोलनको पहिलो र अग्रणी संस्था भएको उहाँले बताउनुभयो ।
संगठनले विधि विधान र पद्दतिको मुल जरा टेकेर संस्थागत सक्षमतालाई समेत हासिल गर्दै आएको उहाँले बताउनुभयो । संगठनले शैक्षिक सुधारसँगै शिक्षकहरुको नेतृत्व विकास गर्दै आएको उहाँको भनाइ छ । पत्रकार सम्मलेनमा संगठनका प्रदेश समितिका पदाधिकारी र मकवानपुर जिल्ला अध्यक्ष श्रीराम दाहाललगायतको उपस्थिति रहेको थियो ।
