हेटौंडाः जाजरकोट भूकम्पपीडितको राहतका लागि बागमती प्रदेश सरकारले कर्णाली प्रदेश सरकारलाई एक करोड ५० लाख सहयोग गर्ने निर्णय भएको छ । बुधबार बसेको बागमती प्रदेश सरकारको मन्त्रीपरिषद् बैठकले जाजरकोटका भूकम्पपीडितको राहतका लागि सहयोग गर्ने निर्णय भएको बागमती प्रदेश सरकारका प्रवक्ता एवम् आन्तरिक मामिला तथा कानुन मन्त्री गंगानारायण श्रेष्ठले बताउनुभयो ।
प्रदेश सरकारले यसअघि भूकम्पपीडितका लागि सहयोग गर्ने घोषणा गरेको थियो । यस्तै बैठकले संगठन संरचना तथा दरबन्दी तेरिज स्विकृत गरेको छ । बैठकले प्रदेशका अधिकृतस्तर एघारौं तहमा ३ जनालाई बढुवा तथा पदस्थापन गर्ने निर्णय गरेको छ । जसमा कृषि विकास निर्देशनालय हेटौंडाको प्रमुखमा सुधीर श्रेष्ठ, कृषि व्यवसाय प्रवद्र्धन सहयोग तथा तालिम केन्द्र भण्डाराको प्रमुखमा नारायण कुमार श्रेष्ठ र डा. गौरीमान श्रेष्ठलाई पशुपन्छि तथा मत्स्य विकास निर्देशनालय हेटौंडाको निर्देशकको रुपमा पदस्थापना गरिएको सरकारका प्रवक्ता श्रेष्ठले बताउनुभयो ।
यस्तै, प्रदेश प्रमुखको कार्यालय सवलीकरण कार्यक्रम अन्तर्गत १० लाख रुपैयाँ विनियोजन गरेको छ । उपसभामुखको अष्ट्रेलिया भ्रमणका लागि मनोनयन गरी सरकारी प्रवेशआज्ञा (भिसा) सिफारिस गरेको छ । पर्यटन पूर्वाधार संचालन तथा व्यवस्थापन कार्यविधि व्यवस्थापन कार्यविधि २०८० स्विकृत गरेको छ । बागमती प्रदेश भ्रमण वर्ष २०२४ घोषणा गर्ने प्रस्ताव पारित गर्ने निर्णय पनि भएको छ ।
