हेटौंडाः दलित महिला संघ (फेडो) ले दलित महिलाका मुद्दासहित १६ बुुँदे घोषणापत्र जारी गरेको छ । बिहीबार हेटौंडामा पत्रकार सम्मेलनको आयोजना गर्दै संघले घोषणापत्र जारी गरेको हो । संघका केन्द्रीय सदस्य एवम् मकवानपुर जिल्ला अध्यक्ष पवित्रा विकले घोषणापत्र प्रस्तुत गर्नुभयो ।
बागमती प्रदेशका १३ वटै जिल्लाका दलित महिला जनप्रतिनिधि र अभियन्ताहरु सहभागी दुई दिने सम्मेलनको छलफलबाट निस्किएका मुद्दाहरु गरिबी, रोजगारी, समानुपातिक प्रतिनिधित्व, निःशुल्क शिक्षा, अन्तरजातीय विवाह, छुवाछुत, चेलिबेटी बेचविखन, बालविवाह, एचआइभी–एड्सको खतरा, बहुविवाह, बलात्कार, प्रजनन् स्वास्थ्य, महिलामाथि हुने विभिन्न हिंसाहरु र यसबाट पर्ने नकारात्मक असरहरुलाई मध्यनजर गर्दै घोषणापत्र जारी गरिएको हो ।
संघले दलित सशक्तिकरण विधेयकको मस्यौदा तयार गरी पास गरेर कार्यान्वयन गर्न माग गरेको छ । यस्तै, हरेक क्षेत्रमा महिला सहभागिताको सुनिश्चितता गर्न माग गरिएको छ । दलित उत्तरदायी बजेट र त्यसको कार्यान्वयनलाई परिणाममुखी बनाउन माग गरिएको छ । बागमती प्रदेशमा समस्याको रुपमा रहेको चेलिबेटी बेचविखन रोकथाम गर्न, गरिब दलित बालबालिकाहरुलाई प्राथमिकतामा राख्ने व्यवस्था गर्न र सबै पाठ्यक्रमहरु लैंगिकमैत्री तथा जातीय समानतामा आधारित निर्माण गर्न माग गरिएको छ । यस्तै, दलित महिलाले सञ्चालन गरेको उद्योग तथा व्यवसायलाई संरक्षण र प्र्रवद्र्धन गर्नका लागि साना उद्योगका लागि बिना धितो ऋण उपलब्ध गराउन माग गरिएको छ ।
अन्तरजातीय विवाह गर्ने जोडीलाई सुरक्षा दिन पनि भनिएको छ । संघका केन्द्रीय अध्यक्ष कला स्वर्णकारले घोषणापत्रलाई प्रदेश सरकार, सबै राजनीतिक दल र सरोकारवाला निकायहरुलाई कार्यान्वयनका लागि आग्रह गरिने बताउनुभयो । संघले समाजमा विद्यमान जातीय, लैङ्गिक, धार्मिक, राजनीतिकलगायत सबै किसिमका विभेद र छुवाछुतको विरुद्ध शून्य सहनशीलताको नीति लिई कार्य गर्न प्रतिबद्धता रहेको जनाएको छ । संघीय, प्रदेश र स्थानीय सरकारले निर्माण गरेका ऐन कानुनहरु र मानव अधिकारसम्बन्धी अन्तर्राष्ट्रिय महासन्धिहरुको प्रभावकारीरुपमा कार्यान्वयन गर्न सहयोगीका रुपमा काम गर्न प्रतिबद्धता रहेको जनाएको छ । बागमती प्रदेशका दलित महिलाहरुको अधिकार प्राप्तिका लागि सचेतीकरण, सशक्तिकरण र संगठित गर्ने संघले प्रतिबद्धता जनाएको छ । बिहिबार सम्पन्न सम्मेलनले पवित्रा बिश्वकर्माको अध्यक्षतामा बागमती प्रदेश समिति गठन गरेको छ ।
